Россия Ички ишлар вазирлиги Эстония бош вазири Кажа Каллас, давлат котиби Таимар Петеркоп, Литва маданият вазири Симонас Кайрис ва Шарқий Европа мамлакатларидаги 100 га яқин сиёсатчи ва амалдорларга нисбатан жиноий иш бўйича қидирув эълон қилди. Бу ҳақда “ТАСС” хабар берди.
Вазирлик Эстония ва Литва расмийлари Жиноят кодексининг тегишли моддалари билан айбланаётганини маълум қилган. Хусусан, Эстония бош вазири Кажа Каллас ва давлат котиби Таимар Петеркопга нисбатан совет тарихига оид уруш ёдгорликларини вайрон қилганлик ва шикастлаганлик учун жиноий иш қўзғатилган. Ушбу иш доирасида уларга нисбатан қидирув эълон қилингани айтилган.
Бундан ташқари, Литва маданият вазири Симонас Кайрис ҳам совет аскарлари ёдгорликларини яксон қилгани учун Россия Ички ишлар вазирлиги томонидан қидирувга берилган.
Ўтган йилнинг сентябрида Россия Тергов қўмитаси 170 дан ортиқ чет эл фуқароларини, жумладан, Латвия, Литва, Эстония, Польша ва Украина фуқароларини совет аскарлари шарафига ўрнатилган уруш ёдгорликларини таҳқирлаганликлари ва вайрон қилганликлари учун сиртдан жавобгарликка тортган эди. Қайд этилишича, ҳарбий қабристонлар, совет аскарларига оид ёдгорлик ва ёдгорликларни таҳқирлаш, бузиш билан боғлиқ 16 та жиноий иш бўйича 143 та ҳолат юзасидан тергов ҳаракатлари олиб борилмоқда.
Изоҳ (0)