Журналистика ва оммавий коммуникациялар университети ректори Шерзодхон Қудратхўжанинг русийзабонлар ҳақидаги гапларидан сўнг “Россотрудничество” у билан барча алоқаларни тўхтатди. Бу ҳақда “Россотрудничество” раҳбари Евгений Примаков маълум қилди.
Шерзодхон Қудратхўжа Alter Ego лойиҳасига берган интервьюсида ўзи яшаётган мамлакат тилини билмайдиганлар “босқинчи ёки аҳмоқ” бўлишини айтганди.
“Карл Маркс таъкидлаганидек, ўзи яшаётган мамлакатнинг тилини билмаганларни икки хил тоифага ажратиш мумкин: биринчиси — босқинчи, кўп одамларнинг онгида улар босқинчидир, иккинчиси — бу аҳмоқ, ўйлай олмайдиган, ўқий олмайдиган одам. Хафа бўлишмасин, шундай экан, ўзлари бир хулоса чиқарсинлар, улар босқинчими ёки аҳмоқми?”, — деган у.
Шундан сўнг “Россотрудничество” раҳбари Евгений Примаков Шерзодхон Қудратхўжа билан ҳар қандай мулоқот ва алоқаларни тўхтатганини эълон қилди.
“Ишончим комилки, жаноб Қудратхўжа нафақат ўзи, балки яқинлари ҳам Россияда ўқиш, у билан фойдали бизнес юритиш, стажировкада қатнашиш ва бошқа имкониятларни қўлга кирита олмаса, ҳатто ўзи ёқтирмайдиган давлатга шунчаки ташриф буюра олмаса ҳам, хафа бўлмайди”, — деди Евгений Примаков.
Унинг сўзларига кўра, “Россотрудничество” Қудратхўжа узр сўрамагунча, у билан, шунингдек, ўзи раҳбарлик қилаётган тузилмалар билан ҳар қандай мулоқот ва алоқалар тўхтатилади.
Маълумот учун, “Россотрудничество” — МДҲ давлатлари, хорижда яшовчи ватандошлар ишлари ва халқаро гуманитар ҳамкорлик бўйича Россия федерал агентлиги.
Изоҳ (0)