Ирландия ва Испания Европа Иттифоқидан Исроилнинг Ғазода инсон ҳуқуқларини ҳурмат қилиш бўйича ўз мажбуриятларига риоя қилаётгани ёки йўқлигини текширишни сўради. Испания президенти Педро Санчес 14 февраль куни бу ҳақда ижтимоий тармоқларда расман маълум қилган. Бу ҳақда CNN хабар бермоқда.
Педро Санчес ва Ирландия бош вазири Лео Варадкар Европа комиссияси раҳбарига мактуб йўллаб, комиссиядан Исроил ўз мажбуриятларини, шу жумладан, Европа Иттифоқи ва Исроил келишуви бўйича унга қўйилган талабларга риоя қилаётгани ёки йўқлигини кўриб чиқишни сўраган. Даъвогарлар бу масалани ҳуқуқий ва демократик тамойилларнинг асосий шарти, Исроил ва Европа Иттифоқи ўртасидаги муносабатларнинг муҳим элементи деб билади.
Испания ва Ирландия етакчилари Европа Иттифоқи раҳбари Урсула фон дер Ляйенга “Исроил ва Ғазодаги вазият ёмонлашаётганидан, айниқса можаронинг бегуноҳ фаластинликлар, болалар ва аёлларга таъсиридан қаттиқ хавотирда эканликлари”ни маълум қилган.
Европа Иттифоқи раҳбарияти икки мамлакат раҳбарияти мурожаатини қабул қилганини тасдиқлаган. Аммо Иттифоқда ҳозирча бу борада келишилган режа ишлаб чиқилмагани билдирилган.
Изоҳ (0)