АҚШ президенти Жо Байденда ҳақиқатан ҳам ёшга боғлиқ прогрессив деменция белгилари намоён бўлаётгани, яхшиланиш умиди йўқлиги маълум қилинди. Бу ҳақда Fox News хабар берди.
Jons Hopkins университети профессори ва жарроҳ Марти Макари давлат раҳбарининг соғлиғидаги ўзгаришларга баҳо берди.
“Байденнинг когнитив қобилиятларнинг пасайиши бизнинг кўз ўнгимизда содир бўлмоқда. Айтайлик, беш йил олдинги билан солиштирганда унинг бугунги фаолияти ўртасида жуда сезиларли фарқ бор. Албатта, бу жуда ачинарли”, — деди профессор Макари.
Унинг фикрича, ҳар қандай одам баъзан сўзларни чалкаштириб юбориши ва нутқида хатога йўл қўйиши одатий ҳолдир. Бироқ Жо Байден мисолида, хотира сусайиши ва нутқнинг секинлашиши шу қадар тез ривожланмоқдаки, улар жиддий ташвиш туғдирмоқда.
“Бундай динамика билан тўсатдан барқарорлашув кузатилиши даргумон. Бу ёшга боғлиқ деменциядир”, — деди Макари.
Аввалроқ АҚШнинг 81 ёшли президенти Жо Байден Оқ уйда бўлиб ўтган матбуот анжуманида ёши кексалигига эътибор қаратган журналистга кескин жавоб қайтарганди. Жумладан, сиёсатчи ўзини давлат раҳбари сифатида ишлашга “энг малакали” деб атаган.
Изоҳ (0)