Ўзбекистонда фарзандлари мактаб дарсларини қолдириб келаётган ота-оналарга огоҳлантириш хати юборилаётгани ижтимоий тармоқларда турли муҳокамаларга сабаб бўлди. Мактабгача ва мактаб таълими вазирлиги матбуот котиби Дилфуза Собирова бунга муносабат билдирди.
Огоҳлантириш хатларида ота-оналарга турли тартибдаги маъмурий жавобгарлик чоралари қўлланиши айтиб ўтилганди.
“Бундан кўзланган мақсад дарсда иштирок этмаётган ўқувчилар оила аъзоларининг масъулияти ва жавобгарлигини оширишдан иборат”, — дейди Дилфуза Собирова.
Шавкат Мирзиёев бошчилигида 5 февраль куни ўтказилган ижтимоий соҳадаги вазифаларга бағишланган йиғилишда мактаблардаги инспектор-психологлар штати Ички ишлар вазирлигидан Миллий гвардия тизимига ўтказилгани айтиб ўтилганди. Дилфуза Собированинг билдиришича, инспектор-психологларнинг асосий вазифаси ўқувчиларнинг таълим-тарбиясини ташкил этишда мактаб жамоаларига яқиндан кўмаклашиш, мунтазам дарс қолдирувчи ўқувчиларнинг ота-оналари билан ишлашдан иборат.
Шу мақсадда дарсларга мунтазам (уч ўқув куни ва ундан ортиқ) сабабсиз қатнашмаётган ўқувчиларнинг яшаш манзилларига тезкор равишда огоҳлантириш хати юборилмоқда. Унда ўқувчиларнинг ота-оналари ёки уларнинг ўрнини босувчи шахсларга Маъмурий жавобгарлик тўғрисидаги кодекснинг 47-моддаси мазмун-моҳияти тушунтириб ўтилган.
Жумладан, фарзандларини тарбиялаш ва уларга таълим бериш борасидаги мажбуриятларини бажармаслик, болаларнинг мажбурий умумий ўрта таълим олишига тўсқинлик қилиш оқибатлари бўйича Маъмурий жавобгарлик тўғрисидаги кодексининг тегишли моддасига асосан қонуний жазо чоралари келтириб ўтилган.
Мактабгача ва мактаб таълими вазирлиги матбуот котиби конституциянинг 77-моддасида ота-оналар ва уларнинг ўрнини босувчи шахслар ўз фарзандларини вояга етгунига қадар боқиши, уларнинг тарбияси, таълим олиши, соғлом, тўлақонли ва ҳар томонлама камол топиши хусусида ғамхўрлик қилишга мажбур экани; “Таълим тўғрисида”ги қонуннинг 51-моддасида вояга етмаган таълим олувчиларнинг ота-онаси ва бошқа қонуний вакиллари болаларининг умумий ўрта, ўрта махсус таълим ёки бошланғич профессионал таълим олишини таъминлаши шарт эканлиги келтириб ўтилганини эслатди.
Изоҳ (0)