Дарсда иштирок этмаётган ўқувчиларнинг хонадонига огоҳлантириш хати етказилади. Бу ҳақда Мактабгача ва мактаб таълими вазирлиги матбуот хизмати хабар берди.
Маълум қилинишича, Мактабгача ва мактаб таълими вазирлиги, Миллий гвардия ҳамкорлигида махсус ишчи гуруҳ тузилди ҳамда бу борада келгусида амалга оширилиши зарур бўлган ишлар режаси тузиб чиқилган.
Қайд этилишича, 2023 йили вояга етмаганлар томонидан 3,5 мингта жиноят содир этилган. Шундан 2 280 нафарини мактаб ўқувчилари содир этган. Мавжуд муаммоларга ижобий ечим топиш мақсадида мактаблардаги инспектор-психологлар штати Ички ишлар вазирлигидан Миллий гвардия тизимига ўтказилиши белгиланди.
Таъкидланишича, эндиликда ота-оналар ва маҳалла фаоллари иштирокидаги мактаб—ота-она—маҳалла ҳамкорлиги узвий ташкил этилади. Шу мақсадда ўқувчиларнинг дарсда иштирок этиш кўрсаткичлари ҳаққонийлигини таъминлаш учун “e.мактаб электрон кундалик”ка ўқитувчилар ва синф раҳбарлари томонидан ўз вақтида қайдлар киритиб борилади.
Республикадаги барча мактабларга ота-оналарга юбориладиган огоҳлантириш хати намуналари етказилган бўлиб, бу орқали дарсда иштирок этмаётган ўқувчилар оила аъзоларининг масъулияти ва жавобгарлиги ҳам оширилади. Эндиликда мактаб масъуллари томонидан шу намунадаги огоҳлантириш хати тезкор равишда ўқувчиларнинг яшаш манзилларига етказилади.
Бунда ота-оналарнинг ўз фарзандларининг мактабга боришини таъминлаш масъулиятини ошириш мақсадида МЖтК 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) мазмун-моҳияти тушунтириб ўтилган. Мазкур вазифаларни амалга ошириш учун ҳар бир мактабга Миллий гвардия офицерлари бириктирилди.
Уч кун давомида Миллий гвардия билан ҳамкорликда олиб борилган тезкор чоралар натижасида 1000 дан ортиқ мактабда ўқувчилар давомати ўрганилган. Сурункали ёки мунтазам дарс қолдираётган 451 нафар ўқувчининг дарсга қатнашиши таъминланган.
Изоҳ (0)