Ўзбекистонда энди аёллар ҳам катта сиғимли автобус ва электробусларни бошқариш ҳуқуқига эга бўлди, деб хабар бермоқда Транспорт вазирлиги матбуот хизмати.
Вазирлар Маҳкамасининг 2024 йил 12 февралдаги тегишли қарорига мувофиқ ҳукуматнинг 2018 йил 31 майдаги 408-сон қарорининг 2-иловаси 27-банди ҳамда 3-иловаси 5-банди ўз кучини йўқотди. Яъни, мазкур нормаларга мувофиқ аёллар фақатгина йўловчиларнинг сони 14 кишидан ошмайдиган автобусни ҳайдовчи сифатида бошқариши мумкин эди. Мазкур нормалар катта сиғимли автобусларни (электробус) бошқаришда аёлларни жалб этиш имконини бермасди.
Эндиликда аёлларга қуйидаги йўналишлар бўйича меҳнат фаолиятини олиб бориш учун ҳуқуқий асос яратилди:
- юк кўтариши 2,5 тоннадан ортиқ бўлган юк автомобилларини бошқариш;
- йўловчиларнинг сони 14 кишидан ортиқ бўлган автобусларни бошқариш.
Эски нормаларнинг бекор қилиниши билан аёлларга қўшимча касб ва соҳаларда меҳнат фаолиятини олиб бориши учун ҳуқуқий асос мустаҳкамланди. Шунингдек, транспорт соҳасида гендер тенгликни таъминлаш ва катта сиғимли автобусларни (электробус) бошқаришга аёлларни жалб этиш имконияти яратилди.
Қайд этилишича, замонавий автотранспорт воситаларининг техник хусусиятлари аёлларга ушбу соҳаларда қулай ва соғлиқларига зарарсиз меҳнат фаолиятини олиб бориш имконини беради.
Жаҳон тажрибасига кўра, АҚШда жами 175 855 та ҳайдовчи бўлиб, шундан 48,9 фоизи аёл ҳайдовчиларга тўғри келади. Туркиянинг Измир шаҳрида жамоат транспорт хизматларини кўрсатувчи ESHOT ташкилотида 2500 минг нафар ҳайдовчидан 200 нафари аёл ҳайдовчилар эканлиги аниқланган.
Изоҳ (0)