Ҳиндистон ҳукумати кафолатланган ҳосил нархи талабларини янгилаш учун Деҳли томон юриш қилаётган фермерлардан иборат намойишларни тўхтатиш учун қаттиқ хавфсизлик чораларини кўришни буюрди. Бу ҳақда Al Jazeera нашри маҳаллий манбаларга асосланиб хабар берди.
13 февраль куни полиция пойтахт Деҳлига олиб кирувчи бир нечта назорат ўтказиш пунктларини тиканли симлар, тўсиқлар ва цемент блоклари билан тўсиб қўйган. Пойтахтда катта йиғинлар ўтказиш тақиқлаб қўйилган. Деҳлига қўшни Ҳаряна штатининг айрим туманларида интернет узилган.
Фермерларнинг бу кўринишдаги норозилик намойишлари илк бор 2021 йилда рўй бериб, бир йилдан ортиқ давом этган. Ўшанда шаҳарга киритилмаган фермерлар унинг теварагида кўчма лагерлар ташкил этиб, намойишларини узоқ муддат давом эттиришган.
Ҳаряна ва Панжобнинг шимолий штатларидан намойиш бошлаган фермерлар барча қишлоқ хўжалиги маҳсулотлари учун кафолатланган минимал қўллаб-қувватлов нархи жорий этилишини сўрамоқда. Қонунга кўра, ҳукумат қишлоқ хўжалиги ишлаб чиқарувчиларини фермер хўжаликлари нархларининг ҳар қандай кескин тушиб кетишидан ҳимоя қилади, бунда маҳсулот таннархини ҳисобга олган ҳолда экиш мавсуми бошида айрим муҳим экинлар учун минимал харид нархи эълон қилиниши керак.
Фермерлар, шунингдек, ҳукуматдан даромадларини икки баравар ошириш ваъдасини бажаришни талаб қилмоқда.
2021 йил ноябрь ойида қишлоқ хўжалиги соҳасига оид қатор қонунларнинг бекор қилиниши Моди ҳукумати томонидан катта чекиниш сифатида кўрилди. Ўша пайтда ҳукумат фермерлар ва ҳукумат амалдорларидан иборат комиссия тузишини айтган. Шундан бери ташкил этилган бир нечта ҳукумат чақирувлари бу масалага нуқта қўймади.
Намойишлар Ҳиндистондаги миллий сайловлардан бир неча ой олдин содир бўлмоқда. Таҳлилчилар навбатдаги сайловларда ҳам Моди ҳукуматни ўзида сақлаб қолишига ишонишаётган эди. Фермерлар билан боғлиқ муаммо эса вазият ҳақида жиддий сигнал берди. Чунки фермерлар Ҳиндистондаги энг нуфузли ва кўп сонли овоз берувчилар синфини ташкил қилади.
Мамлакат сиёсатчилар ҳам узоқ вақтдан бери фермерлар билан ҳисоблашмаслик ва уларни сиёсатдан узоқ сақлашни ақлсизлик дея уқтириб келишаётган эди.
Изоҳ (0)