Россия урушда биринчи марта илғор гипертовушли ракетадан фойдаланди. Мутахассислар бундай ракеталарни уриб тушириш деярли имконсиз деб ҳисоблайди. Бу ҳақда Украина разведкаси тарқатган маълумотларга асосланиб, CNN хабар берди.
Украина пойтахтига 7 февраль куни уюштирилган ҳужумдан сўнг топилган қолдиқлар Россия ҳарбийлари томонидан “Циркон” гипертовушли қанотли ракетаси қўлланганига ишора қилмоқда. Бу турдаги ракеталар урушда биринчи марта қайд этилиши.
“Циркон”, агар Россия ҳукуматининг тегишли қурол ҳақда айтганлари рост бўлса, жуда даҳшатли воситадир. Чунки у Патриот каби Ғарбнинг энг яхши ракетага қарши мудофаа воситаларини ҳам четлаб ўта олади.
Россия расмийлари тақдим этган маълумотларга кўра, “Циркон” ракеталари соатига 9,900 километр масофа босиб ўта олади. Агар бу тасдиқланса, у дунёдаги энг тезкор ракетага айланиб, тезлиги туфайли ундан ҳимояланишни деярли имконсиз қилади.
Парвоз вақтида ракета тўлиқ плазма булути билан қопланади, у радиочастоталарнинг ҳар қандай нурларини ўзига сингдиради ва ракетани радарларга кўринмас қилади. Бу унинг нишонга кетаётганда аниқланмаслигига имкон беради. Ғарб ҳарбий ташкилотлари ушбу қурол хусусиятларини чуқур ўрганишга киришган.
7 февралдаги ҳужумда Украина армияси руслар учирган Искендер ва бошқа бир қанча ракеталарни уриб туширган. Аммо кейинги ҳужумларда гипертовушли ракеталарнинг яна қўлланиши мумкинлиги мудофаа салоҳиятини жиддий хавф остига қўяди.
“Циркон”нинг ҳарбий саноатга олиб кирилишида шахсан Владимир Путиннинг ўзи бош-қош бўлгани айтилади. Президент бу қурол Россияни ҳарбий соҳада тенгсиз қилиши борасида бир қанча фикрларини айтиб келган. Аммо мазкур қуролларни ҳозирда серияли ишлаб чиқариш учун Кремлда иқтисодий асослар етарли эмас.
“Айтганимдек, ушбу ракетанинг дунёнинг ҳеч бир давлатида ўхшаши йўқ. Ишончим комилки, бундай кучли қуроллар Россияни эҳтимолий ташқи таҳдидлардан ишончли ҳимоя қилади. Бу мамлакатимиз миллий манфаатларини таъминлашга ёрдам беради”, — деган эди Путин интервьюларидан бирида.
Изоҳ (0)