Hindiston hukumati kafolatlangan hosil narxi talablarini yangilash uchun Dehli tomon yurish qilayotgan fermerlardan iborat namoyishlarni to‘xtatish uchun qattiq xavfsizlik choralarini ko‘rishni buyurdi. Bu haqda Al Jazeera nashri mahalliy manbalarga asoslanib xabar berdi.
13-fevral kuni politsiya poytaxt Dehliga olib kiruvchi bir nechta nazorat o‘tkazish punktlarini tikanli simlar, to‘siqlar va sement bloklari bilan to‘sib qo‘ygan. Poytaxtda katta yig‘inlar o‘tkazish taqiqlab qo‘yilgan. Dehliga qo‘shni Haryana shtatining ayrim tumanlarida internet uzilgan.
Fermerlarning bu ko‘rinishdagi norozilik namoyishlari ilk bor 2021-yilda ro‘y berib, bir yildan ortiq davom etgan. O‘shanda shaharga kiritilmagan fermerlar uning tevaragida ko‘chma lagerlar tashkil etib, namoyishlarini uzoq muddat davom ettirishgan.
Haryana va Panjobning shimoliy shtatlaridan namoyish boshlagan fermerlar barcha qishloq xo‘jaligi mahsulotlari uchun kafolatlangan minimal qo‘llab-quvvatlov narxi joriy etilishini so‘ramoqda. Qonunga ko‘ra, hukumat qishloq xo‘jaligi ishlab chiqaruvchilarini fermer xo‘jaliklari narxlarining har qanday keskin tushib ketishidan himoya qiladi, bunda mahsulot tannarxini hisobga olgan holda ekish mavsumi boshida ayrim muhim ekinlar uchun minimal xarid narxi e’lon qilinishi kerak.
Fermerlar, shuningdek, hukumatdan daromadlarini ikki baravar oshirish va’dasini bajarishni talab qilmoqda.
2021-yil noyabr oyida qishloq xo‘jaligi sohasiga oid qator qonunlarning bekor qilinishi Modi hukumati tomonidan katta chekinish sifatida ko‘rildi. O‘sha paytda hukumat fermerlar va hukumat amaldorlaridan iborat komissiya tuzishini aytgan. Shundan beri tashkil etilgan bir nechta hukumat chaqiruvlari bu masalaga nuqta qo‘ymadi.
Namoyishlar Hindistondagi milliy saylovlardan bir necha oy oldin sodir bo‘lmoqda. Tahlilchilar navbatdagi saylovlarda ham Modi hukumatni o‘zida saqlab qolishiga ishonishayotgan edi. Fermerlar bilan bog‘liq muammo esa vaziyat haqida jiddiy signal berdi. Chunki fermerlar Hindistondagi eng nufuzli va ko‘p sonli ovoz beruvchilar sinfini tashkil qiladi.
Mamlakat siyosatchilar ham uzoq vaqtdan beri fermerlar bilan hisoblashmaslik va ularni siyosatdan uzoq saqlashni aqlsizlik deya uqtirib kelishayotgan edi.
Izoh (0)