Bloomberg’нинг Украина ҳарбий раҳбариятига яқин манбалари 8 февраль куни ишдан бўшатилган Қуролли кучлар бош қўмондони Валерий Залужний ва Зеленский ўртасидаги келишмовчиликлар ҳам президентнинг хоҳиши билан боғлиқлигини маълум қилди.
Зеленский Залужнийдан “дадилроқ ҳарбий режани” кутган, аммо кутгани амалга ошмаган. Аксинча, Залужний келгуси ойларда фронтда эҳтиёткорроқ ҳаракатларни афзал кўришини маълум қилган.
Валерий Залужний ўрнига аввалроқ Украина армияси қуруқликдаги қўшинларига раҳбарлик қилган Александр Сирский Украина Қуролли кучлари бош қўмондони этиб тайинланди. Bloomberg суҳбатдошларидан бири Залужний янги бош қўмондонни танлашда иштирок этганини айтди. Аммо Александр Сирский, агентликнинг қайд этишича, Украина Қуролли кучлари сафларида катта ишончга эга эмас.
Залужнийдан фарқли ўлароқ, у Россияда ўсгани сабабли украин тилида аксент билан гапиради. Шу билан бирга, у ўзидан олдинги қўмондонга қараганда шафқатсизроқ саналади, деб таъкидлайди Bloomberg.
Владимир Зеленский билан мунтазам алоқада бўлган бир қанча Ғарб расмийлари агентликка ғалаба Украина президенти истайдиган ягона натижа бўлиб қолишини айтди. Агентлик манбаларга таяниб хабар беришича, Залужний Владимир Зеленский ишончини йўқотгани учун ишдан бўшатилган.
Bloomberg эътиборини Владимир Зеленский ва Валерий Залужний ўртасидаги оммавий можаро АҚШ расмийлари янги ёрдам пакети бўйича келиша олмаган пайтда, Украина учун номақбул вақтда содир бўлганига қаратади. Бундан ташқари, агар Дональд Трамп қайтадан президент этиб сайланадиган бўлса, АҚШ томонидан Украинанинг қўллаб-қувватланиши кескин қисқариши мумкинлиги айтилмоқда.
Изоҳ (0)