Грузия президенти Саломе Зурабишвили Ираклий Кобахидзени мамлакатнинг янги бош вазири этиб тайинлади. Бу ҳақда президент администрациясига таяниб, “РБК” хабар берди.
8 февраль кунги парламентдаги 84 нафар депутат Кобахидзенинг Грузия бош вазири лавозимига ишонч вотумини ёқлади, 10 нафар депутат қарши чиқди. Овоз беришда мухолифат иштирок этмади.
Янги ҳукумат таркибида фақат Грузия мудофаа вазири ўзгарди. У парламентнинг собиқ вице-спикери Ираклий Чиковани бўлди.
“Мен кўрсатилган ишонч учун миннатдорман ва уни оқлайман”, — деди Кобахидзе овоз беришдан кейин.
“Стихияга қарши курашга тўсқинлик қилмаслик мақсадида ўз вақтида тегишли актлар расмийлаштирилди”, — дея қўшимча қилди Грузия президенти матбуот хизмати.
Сўнгги кунларда Грузияда кучли ёмғир ва қор ёғди, ёмон об-ҳаво туфайли бир қатор ҳудудларда кўчкилар содир бўлди. Грузия темирйўли шаҳарлараро поездлар ҳаракатини тўхтатди, у фақат 8 февраль куни эрталаб тикланди.
29 январь куни Грузиянинг собиқ бош вазири Ираклий Гарибашвили истеъфога чиқишини эълон қилган эди.
У ҳукмрон “Грузия орзуси – демократик Грузия” партиясини бошқариш ниятида. Гарибашвилининг таъкидлашича, у “мамлакат ва халқ манфаатларини муросасиз ҳимоя қилган” ва бош вазир сифатидаги фаолияти натижаларидан фахрланади.
Ўша куни Имеди ва Рустави2 телеканаллари манбалари Гарибашвили “Грузия орзуси” етакчиси Кобахидзе билан ўрнини алмаштирмоқчи бўлганини хабар қилди.
- Грузия парламентида 150 ўриннинг 75 таси “Халқ кучи” билан коалицияда ҳукуматни тузган “Грузия орзуси”га тегишли. Амалдаги парламентнинг ваколатлари 2024 йилнинг кузида тугайди. 45 ёшли Кобахидзе 2012 йилнинг кузидан бери Грузияда ҳокимият тепасида турган “Грузия орзуси” партиясидан еттинчи бош вазир бўлди.
Изоҳ (0)