Грузия парламенти президент Саломе Зурабишвилига импичмент эълон қила олмади, деб хабар бермоқда Грузиянинг “Биринчи канал”и. Импичмент эълон қилиш учун парламентнинг 150 нафар депутатидан 100 нафари унга овоз бериши керак эди.
18 октябрь куни бўлиб ўтган йиғилишда 86 нафар депутат импичментни қўллаб-қувватлади, бир нафари қарши овоз берди. Парламентнинг қолган аъзолари овоз беришда қатнашмади.
Импичмент жараёнини парламентда 84 ўринга эга бўлган ҳукмрон “Грузия орзуси” партияси бошлаган эди.
Овоз бериш бошланишидан олдин “Грузия орзуси” парламент фракцияси раҳбари Ираклий Кобахидзе депутатлар олдида сўзга чиқиб, импичментни қўллаб-қувватловчи далилларни тақдим этди. Кейин Саломе Зурабишвили нутқ сўзлади. Чиқишидан сўнг Грузия президенти депутатларнинг саволларига жавоб беришдан бош тортди.
Грузия парламенти ўз тарихида биринчи марта президентга импичмент эълон қилишга уринди. Процедура Конституциявий суд томонидан тегишли рухсатнома берилганидан сўнг бошланган: суд Зурабишвилини август ва сентябрда хорижга амалий ташрифлари чоғида Грузия ҳукумати розилигисиз халқаро муносабатлар соҳасида вакиллик функцияларини амалга оширгани ва шу орқали Грузия конституциясининг 52-моддасини бузганини таъкидлади.
Саломе Зурабишвили 2018 йилнинг 16 декабридан буён Грузия президенти лавозимида ишлаб келмоқда. У бир неча бор ҳукумат қарорларини очиқчасига танқид қилган.
Парламентли республика бўлган Грузияда президентнинг ваколатлари чекланган.
Изоҳ (0)