Sirdaryo hokimi bir nechta mas’ullarni ma’naviyatsizlikda ayblab, ular ishdan olinishini aytdi

Sirdaryo viloyati hokimi Akmaljon Mahmudaliyev viloyatdagi bir nechta rahbarlarni prezidentning ma’naviyatga oid topshiriqlari ijrosini ta’minlamaslikda, ma’naviyatsizlikda ayblab, ulardan bir nechtasi ishdan olinishini aytdi. Bu haqda hokim 2023-yilning 6-fevral kuni viloyat hokimligi binosida bo‘lib o‘tgan yig‘ilishda gapirgan. 

Noinsof tashkilot rahbarlari ma’naviyatga bee’tibor bo‘lgani uchun arizasini olaman. Necha marta ogohlantirish berdik, ataylab kuzatib yuribman, — deydi mas’ullarni koyigan hokim. 

Hokim yig‘ilish davomida barcha o‘rinbosarlariga yuzlanib, ularni ham topshiriqlar ijrosini nazorat qilmaslikda ayblagan. 

Ma’naviyat nima ekanini tushunmayapsanlarmi? Ayb ish qilib qo‘ygan boladek yerga qarab turaverasan, noinsof. Prezidentning ma’naviyat bo‘yicha kuyib-pishib gapirgan gaplari, topshiriqlari ijrosini ta’minlamaysan. Kunlik monitoring qilib, mana buni qilib qo‘y. Ey, oddiy yilning nomini yozmagan noinsof, — deydi hokim o‘rinbosarlarini tanqid qilar ekan. 

Akmaljon Mahmudaliyev viloyat tashkiloti rahbarlari orasida ma’naviyatga doir topshiriqni uddalaganlarni olqishlab, ularga rahmat aytdi. 

Pedinstitutga rahmat, sport boshqarmasi va sanitariyaga rahmat, qolgan hammasida qizili bor, — deydi hokim. 

Sirdaryo hokimi yig‘ilish davomida mas’ullarning biriga “Vatanparvar” tashkiloti viloyat kengashi raisi Ulug‘bek Imomqulovni, viloyat “Bozorsavdo” uyushmasi raisi Hamid Saydaliyevni lavozimidan olish haqida topshiriq beradi. Yangiyer shahri hokimi Otabek Nosirov va uning yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Jasur Egamberdiyevga hayfsan berilishini aytadi. 

Moliya boshqarmasi, nima, o‘lib qolasanmi o‘zing pulning tepasida o‘tirib, bir dona gazetaga yoki jurnalga obuna bo‘lolmaysan, noinsof, — deydi viloyat rahbari. 

Sirdaryo hokimi yig‘ilish so‘ngida ma’naviyatga doir prezident topshiriqlarini bajarmaslik ishdan olinishga sabab bo‘lishini eslatadi.