НАТО давлатлари Россия билан зиддиятга киришишни хоҳламайди, деди Германия канцлери Олаф Шольц. У НАТОни Россия-Украина можаросига тортишга бўлган ҳар қандай уринишларга АҚШ ва Европа Иттифоқи қаршилик кўрсатишини таъкидлади. Шу билан бирга, канцлер Украина тез орада жиддий қурол тақчиллигига дуч келиши мумкинлигини айтиб ўтди.
“Бизнинг қўллаб-қувватлашимизга қарамай, Украина тез орада жиддий қурол ва ўқ-дорилар етишмаслигига дуч келиши мумкин. Баъзи молиявий мажбуриятлар аллақачон тугади, бошқалари эса узайтирилиши керак”, — дейди Шольц The Wall Street Journal учун ёзган мақоласида.
Олаф Шольц Европа Иттифоқи Украинанинг энг йирик молиявий ҳомийси эканлигини, Германия ёрдами эса Америкадан кейин иккинчи ўринда туришини таъкидлади.
Америка матбуоти сўнгги ҳафталарда Украина армиясида қурол-яроғ етишмаётгани ҳақида хабар бермоқда. АҚШ Конгресси 2023 йил кузидан бери Украинага ёрдам бериш борасида келиша олмаяпти. Бир кун аввал, 7 февраль куни АҚШ Сенатида икки партия ўртасида маблағ ажратиш, жумладан, Киевни қўллаб-қувватлаш бўйича келишув процессуал овоз беришдан ўтмади.
Европа Иттифоқида Украинани молиялаштириш механизмлари борасида баҳслар давом этмоқда. ОАВ хабарларига кўра, Германия Европа тинчлик жамғармасининг иш схемасидан норози бўлган.
Изоҳ (0)