АҚШ ва Европа Иттифоқи давлатларидан Украинага ёрдам камайган тақдирда, Германиянинг бир ўзи Украина томони учун зарур бўлган барча нарсани таъминлай олмайди. Бу ҳақда Германия канцлери Олаф Шольц Бундестагда 2024 йилги бюджетни қабул қилишга бағишланган дебатда айтиб ўтди.
Украина бир ойдирки АҚШдан ёрдам олмаяпти, чунки Республикачилар қаршилиги туфайли Конгресс президент Жо Байденнинг Киев учун сўраган 61 миллиард долларини маъқуллай олмаяпти.
Европа Иттифоқи давлатлари Украинага 50 миллиард евролик узоқ муддатли ёрдам дастури шартларини муҳокама қилмоқда, аввалроқ Венгрия унга вето қўйганди. Европа Иттифоқи мамлакатлари эртага, 1 февраль куни бу борада якуний қарор қабул қилиши кутилмоқда. Олаф Шольц АҚШ ва Европа Иттифоқи Украинага ҳарбий ёрдам беришни охир-оқибат маъқуллашига ишонч билдирди.
“Аммо бир лаҳза тасаввур қилинг, агар Украинага ёрдам бўйича келишувга эришилмаса, Германия Украинага дунёдаги энг йирик қурол етказиб берувчига айланади. Ҳурматли дўстлар, биз халқаро миқёсда бу вазиятнинг ривожланишига йўл қўймаслик учун барча имкониятларни ишга солишимиз керак, чунки ёлғиз ўзимиз бардош бера олишимизга ишониш қийин”, — деди Олаф Шольц.
Изоҳ (0)