Исроил бош вазири Биньямин Нетаньяху ҲАМАС таклиф қилган сулҳ режасига қарши чиқди. Бу ҳақда BBC хабар берди.
Нетаньяхунинг сўзларига кўра, ҲАМАС устидан бир неча ой ичида тўлиқ ғалаба қозониш мумкин.
“Биз тўлиқ ғалаба қозониш йўлидамиз. Бу бир неча йиллар масаласи эмас, балки ойлар масаласидир”, — деди Исроил бош вазири матбуот анжуманида.
У Ғазо жанубидаги Рафаҳ шаҳрига ҳам ҳужум уюштиришни буюрди, у ерда уруш зонасида ўз уйларини ташлаб кетишга мажбур бўлган юз минглаб фаластинликлар бошпана топган.
ҲАМАС қандай таклиф берган эди?
Фаластиннинг ҲАМАС гуруҳи Ғазо секторида ўт очишни 135 кунга тўхтатиш бўйича уч босқичли режа таклиф қилди.
- Биринчи босқич 45 кун давом этади. Унда Исроил қамоқхоналаридаги фаластинлик аёллар ва ўсмирлар эвазига гаровга олинган барча исроиллик аёллар, 19 ёшгача бўлган болалар, кексалар ва касаллар озод қилинади. Бу даврда Исроил қўшинлари ҳам Ғазонинг аҳоли пунктларини тарк этиши ва у ерда касалхоналар ҳамда қочқинлар лагерларини реконструкция қилиш ишлари бошланиши керак эди;
- Иккинчи босқичда гаровга олинган исроиллик эркаклар фаластинлик асирларга алмаштирилиши ва Исроил қўшинлари Ғазодан бутунлай чиқиб кетиши керак;
- Қолган 45 кун ичида ҳар икки томондан ҳалок бўлганларнинг жасадларини алмашиш режалаштирилганди.
ҲАМАСга кўра, келишув Ғазога озиқ-овқат ва бошқа инсонпарварлик ёрдамларини кўпайтиришни ҳам ўз ичига олган.
Ноябрь ойидаги сулҳ давомида 100 га яқин гаровдаги исроиллик 240 нафар фаластинлик асирга алмаштирилган бўлса-да, ҲАМАСнинг янги талаблари АҚШ президенти Жо Байден маъмурияти томонидан совуқ кутиб олинди. Исроил мудофаа вазири Йоав Галант ҳам ҲАМАСнинг шартлари Исроил учун қабул қилиниб бўлмаслигини айтди.
Изоҳ (0)