“Аватар” (2009) ва “Аватар: Сув йўли” (2022) фильмлари режиссёри Жеймс Кэмерон People’га берган интервьюсида мазкур фильмларнинг давоми устида иш бошлагани ҳақида маълумот берди.
“Биз сценарийнинг барча қисмларини, жумладан бешинчи қисмни ҳам тўлиқ ёздик, менда олтинчи ва еттинчи фильмлар учун ғоялар тайёр. Бироқ, катта эҳтимол билан эстафетани бошқага топшираман, ахир биз абадий эмасмиз. Шундай бўлса-да, ҳозир мен қилаётган ишимдан катта завқ оляпман. Командамиз ажойиб инсонлардан иборат”,— дейди 69 ёшли режиссёр.
Унинг сўзларига кўра, “Аватар” фильмини “Юлдузлар жанги” ва “Юлдузли йўл” каби машҳур франшизага айлантириш нияти бор, чунки ушбу туркум фильмлар Кэмеронни болаликдан илҳомлантириб келган.
“Биз яқинда “Аватар-3” нинг биринчи ярми устида ишларни тугатдик, инсонлар юрагига таъсир кўрсатиш учун эса чин қалбдан ишлаш ва бор кучингизни фильм сифатига сарфлашингиз керак”, — дейди режиссёр.
Кэмероннинг айтишича, унга бир савол кўп берилади: нега фақат битта иш устида фаолият олиб борасиз? “Мен муаллиф сифатида томошабин билан алоқани яхши ҳис қиламан, аудиторияга нима ёқишини тушунсак, нега вақтни бошқа нарсага сарфлаш керак? ”, — дейди Кэмерон.
“Аватар-3” фильмининг премьераси 2025 йил 19 декабрда, тўртинчиси 2029 йилда ва бешинчиси 2031 йилда намойиш этилиши режалаштирилган. Фильмнинг биринчи ва иккинчи қисмлари тарихда энг юқори даромад келтирган фильмлар рўйхатида мос равишда биринчи ва учинчи ўринларни эгаллайди. Биринчи фильм 2,9 миллиард доллар, иккинчиси эса 2,3 миллиард доллардан ортиқ даромад келтирган.
Изоҳ (0)