“Муҳаббат қаҳваси” эфирга узатилганига 30 йил тўлди: Сериалнинг бош қаҳрамонлари ҳозир қандай кўринишда? (фото)

Лотин Америкасида суратга олинган энг муваффақиятли сериаллардан бири “Муҳаббат қаҳваси” “Ёшлар” телеканалида 15 февралдан бошлаб эфирга қайтмоқда. Илк марта эфирга узатилганига 30 йил тўлган сериал сабаб машҳурлик чўққисига чиққан актёрлар билан бирга ўша даврларни ёдга оламиз.

Сериал сюжети

Бепоён қаҳва даласи. Бир гуруҳ ишчилар қаҳва териш билан банд. Улар орасида ёқимли овозга эга жингалаксоч Гавиота ҳам қўшиқ куйлаб қаҳва термоқда. Оддий қаҳва эмас, муҳаббат қаҳваларини.

Бадавлат фермер Октавионинг дафн маросимига ташриф буюрганлар ичида унинг набираси Себастьян ҳам бор. У қаҳва терувчи қизга ошиқ бўлган. Лондонга ўқиш учун кетган Себастьян ва уни излаб ортидан бегона юртларга борган Гавиотани олдинда бир қанча синовлар кутиб турар эди. Жуфтлик бир-бирига нисбатан ҳар қанча нафрат ва аламзадалик кайфиятида бўлмасин, “Муҳаббат қаҳваси” уларни яна бир жойда учраштираверади.

“Муҳаббат қаҳваси” сериали сценарийси марҳум ёзувчи Фернандо Гайтанга тегишли бўлиб, 1994 йилда экран юзини кўрди ва қаҳва терувчи Гавиота исмли қиз ҳамда машҳур қаҳвачилар оиласининг вакили Себастьяннинг муҳаббати миллионлаб томошабинлар эътиборини тортди.

Колумбиянинг Багота шаҳрида жойлашган қаҳва далалари ва шаҳар манзаралари орасида кечган муҳаббат ҳикояси қаҳва маданиятини бутун дунёга машҳур қилган энг биринчи сериал намунасига айланди. Фильми муваффақиятга эришган Гайтан 58 ёшида юрак хасталиги туфайли вафот этди.

Бош қаҳрамон Гавиота (Маргарита Роса де Франсиско) 28 ёш, Себастьян эса (Гай Эккер) 25 ёшда эди. Фильм шуҳрат қозониш билан бирга бир неча танловларда ҳам ғолиб бўлди.

Маргарита Роса де Франсиско

Актриса 1965 йил 8 августда Колумбиянинг Кали шаҳрида туғилган. У мусиқачи ва актёр Херардо де Франсиско ҳамда модельер Мерседес Бакоронинг қизи эди. Унинг опаси Мартина де Франсиско ҳам телебошловчи бўлган.

Маргарита болалигида Кали шаҳридаги Антонио Мария консерваторияси балет йўналиши бўйича таълим олади ва умуртқа поғонасидаги касаллик туфайли бу соҳани тарк этишга мажбур бўлади. Кейинчалик инглиз тилини ўрганиш мақсадида Нью-Йоркка кетади ва 1984 йил “Йил гўзали” эътирофига сазовор бўлади.

1984 йил Колумбиядаги “Миллий гўзаллик” танловида олий ўрин совриндорига айланади. Афсуски, 1985 йилда ўтказилган “Дунё гўзали” танловида аввалгидек муваффақиятга эришолмайди.

1986 йилда режиссёр Хулио Сезарнинг “Галлито Рамирес” теленовелласида Карлос Вивес билан танишади ва орадан икки йил ўтиб, улар турмуш қуради. Аммо актрисанинг никоҳи муваффақиятсизликка учрайди. 

Шу тарзда бир қанча муваффақиятли роллар ижросидан сўнг, у 2003 йили 46 ёшида ўзидан 8 ёш кичик, 38 ёшли Даниел Кастеллога турмушга чиққан.

Гай Федерик Эккер

Сериалда Себастьян ролини ижро этган актёр Гай Федерик Эккер 1959 йил Бразилиянинг Сан-Паулу шаҳрида дунёга келган. У ота-онаси АҚШдан Бразилияга таътилга қайтган пайтда дунёга келди. Оилада учинчи бўлиб туғилган фарзанднинг акалари ва сингиллари ҳам бор.

Актёр уч тилда – португал, испан ва инглиз тилларида бемалол сўзлаша олади. У АҚШ ва Лотин Америкасида суратга олинган кўплаб фильмларда роль ижро этган. Ижоди давомида ҳаммаси бўлиб 20 га яқин кино ва теленовеллаларда суратга тушган.

Актёр ҳам партнёри каби икки маротаба оила қурди. Биринчи турмуш ўртоғи америкалик актриса, хонанда, телебошловчи ва продюсер Ниа Пиплз эди.  

Иккинчи турмуш ўртоғи Эстела Сайнс билан у мустаҳкам оила қуриб, улар икки фарзанд кўрган.