Ўзбекистонда ўн минглаб қурилиш компаниялари солиқдан қочиш учун ходимлари сонини яшириб кўрсатмоқда. Бу ҳақда Савдо-саноат палатаси раиси Даврон Ваҳобов тадбиркорлар билан учрашувда маълум қилди.
Даврон Ваҳобовнинг айтишича, бугун мамлакат қурилиш саноатида 34,5 мингта корхона фаолият юритмоқда. Шундан 24,1 мингтаси қурилиш корхоналари, 10,4 мингтаси қурилиш материаллари ишлаб чиқарувчи корхоналардир.
“Сататистик рақамларга кўра, қурилиш компанияларида ўртача 9 нафар ишчи, қурилиш материалларини ишлаб чиқариш корхоналарида эса ўртача 14 нафар ишчи ишлаб келмоқда. Аслида қурилиш компанияларида бу кўрсаткич бир неча баробар кўпроқ бўлиши керак эмасми? Таҳлил қилинганда, 2023 йилда 10 минг 947 та корхонага 1 нафар ишчи, 4 минг 219 та корхонага 2 нафардан, 5 минг 585 та корхонага 4-10 нафар ишчи ходим тўғри келаётгани маълум бўлди”, — деди палата раҳбари.
Даврон Ваҳобов сўзи давомида Тошкент вилоятидаги қурилиш компанияларидан бири ишчилар сонини қандай яширганини мисол келтирди.
“У корхона, номини ошкор қилмаймиз, 2023 йилда 41 миллиард сўмлик қурилиш ишларини амалга оширган. Ва 48 та хонадонли кўпқаватли турар жойни қуриб, фойдаланишга топширган. Эътиборлиси, корхона 36 миллиард сўмлик қурилиш материаллари ва уй жиҳозлари сотиб олган. Бироқ солиқ ҳисоботларида ушбу корхона ходимларининг сони бир нафар этиб кўрсатилган. Ахир бир нафар ходим билан шунча ишни қилиб бўлмаслигини ҳаммамиз тушунамиз-ку”, — деди у.
Аввалроқ мамлакатдаги хусусий секторда фаолият кўрсатаётган 232 мингта корхонада ишчилар сони бор-йўғи 1 нафарни ташкил қилиши айтилганди.
Изоҳ (0)