Тошкент вилояти Пискент туманида эркак ўз танишини дўппослагани акс этган видеони тармоқларда тарқатиб юборди. Вилоят ИИББ ушбу шахс қўлга олинганини ва чоралар кўрилаётганини маълум қилди.
Хабар берилишича, ҳолат Тошкент вилояти ИИББ тезкор-қидирув хизмати ходимлари томонидан ўрганилди. 2023 йилнинг май ойларида Пискент туманида яшовчи, 1986 йилда туғилган Темур ва унинг таниши, 1990 йилда туғилган Игор (мастлик ҳолатида бўлган) ўртасида ўзаро келишмовчилик сабаб жанжал келиб чиққан.
Темур жанжал вақтида Игорнинг турли жойларига урган ва мазкур ҳолат атрофдаги овқатланиш шохобчасининг кузатув камерасига тушиб қолган. Шундан сўнг у ҳолат акс этган видеоёзувни шахсий телефонига суратга олган ва орадан 8 ой ўтиб, 2024 йил 1 январь куни ўзининг Instagram тармоғидаги саҳифасига жойлаштирган.
Ҳозирда мазкур ҳолат юзасидан ушланган шахсни Маъмурий жавобгарлик тўғрисидаги кодекснинг 183-моддаси (майда безорилик) ва 189,1-моддаси (зўравонликни тарғиб қилувчи материалларни тарқатиш) билан жавобгарликка тортиш чоралари кўрилмоқда.
Қайд этилишича, ўтган давр мобайнида ушбу ҳолат юзасидан ИИОга ёки тиббиёт бирлашмасига бирор-бир мурожаат келиб тушмаган.
Изоҳ (0)