“Боғча” очган 1,5 мингдан зиёд хусусий тадбиркор ноқонуний ҳаракатлар содир этган

1,5 мингдан зиёд боғчада давлат бюджетидан ноқонуний пул маблағларини ўзлаштириш ҳаракатлари аниқланган. Бу ҳақда Мактабгача таълим агентлиги матбуот котиби Мавлуда Асқархўжаевага таяниб ЎзА хабар бермоқда.

Қайд этилишича, 2023 йил 27 декабрь ҳолатига 734 та давлат хусусий шерикчилиги асосида мактабгача таълим ташкилотлари томонидан бир боланинг маълумотлари Нодавлат мактабгача таълим ташкилотларини бошқариш ахборот тизимига киритилиб, унинг фотосурати ўрнига бошқа боланинг фотосурати асосида давомати белгиланиб келган. Натижада уларга нисбатан 8,8 млрд сўм субсидия тўловлари уч ойга тўхтатилди.

Шунингдек, 895 та ДХШ асосида, жумладан, оилавий мактабгача таълим ташкилотлари томонидан воситачилар ёрдамида компьютерларда виртуал мобил қурилмани яратиш орқали ҳақиқатда МТТга келмаган тарбияланувчи ва ходимларнинг давомати сохталаштирилиб НМТТБATга юборилган. Уларга огоҳлантириш хатлари берилди ҳамда 8,9 млрд сўм асосланмаган субсидия тўловларининг молиялаштирилиши олди олинди.

Маълумотлар тегишли тартибда ҳуқуқни муҳофаза қилувчи органларга тақдим этилган.