Сурхондарё вилояти Музработ туманида хотинини тириклайин тандирга солиб, ёқиб юборган эркакка суд ҳукми ўқилди. Бу ҳақда Олий суд ахборот хизмати “Дарё”га хабар берди.
Хабарга кўра, С.К. С.Б. билан 1990 йилда турмуш қуриб, у билан Музработ тумани “Орият” маҳалласида яшаб келган. Турмуши давомида уч нафар фарзандли бўлганига қарамасдан, рафиқаси С.Б.ни унга хиёнат қилганликда айблаб, эр-хотинлик муносабатларига киришмай қўйгани учун қасддан ўлдиришни режалаштирган.
Режага асосан турмуш ўртоғи С.Б.нинг уйда ёлғиз қолишини кутиб, 2023 йил 29 август куни Музработ тумани “Орият” маҳалласидаги уйида у билан бирга яшовчи ўғли С.И. Россияга ишга кетгани, келини Д.М. ота-онасининг уйига кетгани ва қизи С.И. шу куни эрталаб соат 05:00 ларда Термиз шаҳрига кетганини билган. Уйда турмуш ўртоғи ошхонасида тандирга ўт ёқаётган вақтида унинг ёнига келиб, С.Б.дан жинсий яқинлик қилиши ҳақида яна бир марта сўраб, ундан рад жавобини олган. Шундан сўнг, унинг кўкрак қафасига қўлининг мушти билан уриб, ёниб турган тандирга тириклайин ташлаб юборган.
Тандирнинг ичига ўтин ва ёниши мумкин бўлган бошқа ашёларни ташлаб, ташқарига чиқиб, мазкур жиноий режасини охиригача амалга ошириш мақсадида ошхонанинг эшигини ёпиб қўйиб, фуқаро С.Б.ни қасддан ўлдирган.
Суд тиббий экспертизасининг 2023 йил 29 августдаги 31-сонли мурда экспертиза хулосасига кўра, С.Б.нинг мурдаси танасида яъни бош, юз, бўйин, кўкрак қафаси барча юзаси, қорин, бел, иккала думба, жинсий аъзолари, оралиқ соҳа, иккала қўл ва оёқлар соҳасида 3- ва 4-даражали тана юзасининг 100 фоиз термик куйган яралари каби тан жароҳатлари аниқланган бўлиб, улар юқори ҳарорат, яъни аланга таъсирида етказилгани ушбу тан жароҳатлари оғирлик даражаси бўйича “ҳаёт учун хавфли бўлган оғир” тан жароҳатлари бўлиб, унинг ўлими сабаби билан бевосита боғлиқлиги кўрсатилган.
Суд эркакни Жиноят кодексининг 97-моддасси (қасддан одам ўлдириш) билан айбдор деб топган ва унга нисбатан 19 йил муддатга озодликдан маҳрум қилиш жазосини тайинлаган. Шунингдек, жазонинг дастлабки 3 йилини турмада, қолган қисмини умумий тартибли колонияда ўташ белгиланган.
Изоҳ (0)