Украина президенти Владимир Зеленский ҳукумати 29 январь куни Украина Қуролли кучлари бош қўмондони Валерий Залужнийни ишдан бўшатишни режалаштирган эди, бироқ унинг истеъфоси ҳақидаги маълумотлар ошкор қилингани сабабли буни кейинга қолдирди, деди Тhе New York Times нашрига украиналик собиқ юқори лавозимли амалдор.
Режалар билан таниш бўлган Украина парламенти депутати буни тасдиқлаб, Зеленский ва Залужний 29 январь куни кечқурун учрашгани, бироқ қарор қабул қилинмаганини қўшимча қилди. Унинг сўзларига кўра, бунга тўсиқлардан бири бош қўмондон лавозимига Залужнийнинг ўрнига зудлик билан бошқа номзод топилмагани бўлган.
The Economist нашрининг ёзишича, Украина Қуролли Кучлари қуруқликдаги кучлари қўмондони Александр Сирский ва Украина разведкаси раҳбари Кирилл Будановлар бош қўмондон лавозимига номзодлар сифатида кўриб чиқилган. Нашрнинг таъкидлашича, Буданов “охирги дақиқада” бу лавозимдан бош тортган. Шу билан бирга, Будановнинг яқин ҳамкасби у Залужнийнинг лавозимига ариза бермаганини, аммо бу лавозимни рад этишга ҳақли эмаслигини айтди.
Газета 29 январь куни кечқурун Зеленский ва Залужний ўртасида учрашув бўлиб ўтганини тасдиқлашга муваффақ бўлганини, унда президент бош қўмондонни ишдан бўшатишини эълон қилгани ва унга бошқа лавозим — Миллий хавфсизлик ва мудофаа кенгаши котибини таклиф қилганини ёзди. Бироқ Залужний буни рад этган.
Эслатиб ўтамиз, 29 январь куни кечқурун Украина оммавий ахборот воситалари ва сиёсатчилари Залужнийнинг ишдан бўшатилиши ҳақида хабар тарқатишни бошлади. Хусусан, Олий Раданинг собиқ депутати Борислав Береза Украина президенти офисидаги манбаларга таяниб, бош қўмондон Украина Миллий хавфсизлик ва мудофаа кенгашига раҳбарлик қилиш ёки элчи бўлиш таклифини рад этганини айтди. Шу билан бирга, Береза Буданов ва Сирский бош қўмондон лавозимидан бош тортаётганини таъкидлади.
Раданинг амалдаги депутати Алексей Гончаренконинг айтишича, Залужний Европа давлатларидан бирига элчи бўлиш таклифини рад этган.
Украина раҳбарияти Залужнийнинг ишдан бўшатилиши ҳақидаги маълумотни рад этди. “Ҳурматли журналистлар, бирйўла ҳаммага жавоб қайтарамиз: йўқ, бу ҳақиқат эмас”, — деб ёзди Украина Мудофаа вазирлиги ўзининг Telegram каналида.
Украина президентининг матбуот котиби Сергей Никифоров кейинроқ аниқроқ баёнот берди: “Албатта, йўқ. Президент бош қўмондонни ишдан бўшатгани йўқ”.
Financial Times нашрининг ёзишича, Залужнийни ишдан бўшатиш тўғрисидаги қарор аввалроқ Украина президентининг офисида қабул қилинган, бироқ вазият оммавий ахборот воситаларида эълон қилингани сабабли улар буни кейинга суришга қарор қилишган. Газетанинг ёзишича, Зеленский бош қўмондонга мудофаа маслаҳатчиси лавозимини эгаллашни таклиф қилган ва ҳар қандай ҳолатда ҳам ўз лавозимидан четлатилишини “аниқ қилиб билдирган”.
Изоҳ (0)