“Соядаги одамлар” — Аёли ва ўғлини институтда ўқитиш учун чиқинди ташувчи бўлиб ишлаётган замондошимиз билан суҳбат (фото, видео)

Чиқинди ташувчи... Бизнингча, ҳеч ким бу касбда ишлашни орзу қилмаса керак. Аммо ҳаётимизда у инсонларнинг ўрни шу қадар каттаки, бир кун ишламаса, дарров сезилади. “Соядаги одамлар” лойиҳасининг навбатдаги қаҳрамони Баҳодир Оролов етти йилдан буён чиқинди ташувчи бўлиб ишлайди. У касбининг ортидан рўзғор тебратаётгани ва фарзандларини ўқитаётганидан фахрланади.

— Махсустранс соҳасига ишга кирганимга етти йил бўлди. Ундан аввал ҳайдовчилик билан шуғулланганман. Бу соҳага ишга киришимга яқин дўстим сабабчи бўлган. Бу ишнинг ўзига яраша машаққати ҳам, енгиллиги ҳам бор. Қиш кунлари ишимиз тонгги олтидан бошланади. Ҳар куни камида икки марта белгиланган ҳудудларни айланиб чиқамиз. Баъзан ишим чўзилиши, баъзида эса эртароқ тугаши ҳам мумкин.

Ишга энди кирган пайтларим чиқиндилар бирмунча кам эди. Тошкентда аҳоли сони ортгани сари чиқинди ҳам ошиб боряпти. Кунига белгиланган ҳудуддан 10 тоннага яқин чиқинди тўплаймиз. 

Баъзи инсонлар меҳнатимизнинг қадрига етади. Аҳоли чиқинди ташувчи машина соат нечада келишини яхши билади. Афсуски, эътиборсизлик сабаб, баъзилар чиқиндиларини ўз вақтида ташқарига чиқариб қўймайди. Кеч олиб чиқилган чиқиндиларни кўрганлар бизни яхши ишламаётганликда айблайди. Ёки аҳолининг ўзи тегишли ташкилотларга қўнғироқ қилиб, арз қилади. Шундай вазиятларда чиқинди йиғилган ҳудудларга қайтадан боришимизга тўғри келади.

Чиқинди ташлашнинг ҳам ўзига яраша маданияти бор. Уларни пакетларга солиб, тартиб билан қўйса ишимиз ҳам осон бўлади. Баъзида нон ва егуликларнинг чиқиндилар орасига ташланганини кўриб ичингиз ачийди. Одамлар чиқинди ташлашда ҳам эътиборлироқ бўлишлари керак.

Ойлик маошимиз у қадар юқори эмас. Ҳозирча ойига икки миллион олти юз минг сўм ойлик оламан, энди ошиб қолади, дейишяпти. Ойлик маошимиздан ташқари, кундалик тушумимиз ҳам бор. Чиқиндига ташланган пластик идиш ва қоғозларни йиғиб, сотамиз. Тўғри, у қадар кўп пул бўлмайди, аммо ҳар ҳолда чой пули ва йўлкирага ярайди.

Ўзим ҳеч қаерда ўқимаганман, шу боис фарзандларим мендек қийналишларини истамайман. Аёлим бошланғич синфларга дарс берарди, у институтда сиртдан ўқияпти. Тўнғич ўғлим эса хусусий университетда таҳсил олади. Маошим у қадар кўп бўлмаса ҳам шартнома пулларини тўлашга етяпти, баракасини берсин. Тўрт нафар фарзандим бор, қолганларини ҳам тўнғич фарзандимдек институтда ўқишларини истайман.

Касбимдан ҳеч қачон уялмайман, чиқиндиларни йиғиб, ернинг юзини тозалаш савобли иш. Энг муҳими ҳалол меҳнат қилиб, болаларимни боқяпман. Ишимдан фахрланаман, — дейди “Миробод-махсустранс” филиали ходими Баҳодир Оролов.