Бозорнинг балиқ расталарида мавсум пайти иш қизийди. Сотилган балиқлар харидорга шу жойнинг ўзида тозалаб берилади. Ҳар бир сотувчининг алоҳида балиқ тозаловчи ишчиси бор. Аммо Жамшид Каримов иккисини ҳам ўзи бажаради. Сотган маҳсулотини харидорга тозалаб ҳам беради. У 25 йилдан бери шу иш ортидан оиласини боқяпти.
Жамшид Каримов Юнусобод деҳқон бозорида балиқ тозалайди. Бу ишни балиқ сотишни бошлаган дастлабки йилларида ўрганган. У “Дарё” мухбири билан суҳбатда ишининг машаққатлари, 9-синфдан кейин ўқишни давом эттиролмагани, қассоблик қилгани ва болаларини ўқитиш нияти билан яшаётгани ҳақида гапириб берди.
“Ишни 1998 йилда Чиноздан ўлган балиқ олиб келиб сотишдан бошлаганмиз. Ҳозиргидай аквариумлар ривожланмаган эди. У пайтларда балиқни текин тозалаб берардик. Чунки асосан маҳсулотни сотсак, бўлди эди. Алоҳида тозаловчи ишчи йўқ эди, ҳаммасини ўзимиз қилардик. Бу одатга айланган. Иш танлаб ўтирмаймиз, сотган балиғимизни ўзимиз тозалаб бераверамиз. Агар мен харидор билан савдолашаётган бўлсам, шеригим ҳам ўзи тозалайди. Баъзида бизда савдо бўлмай қолса, ёнимиздаги савдогарлар ҳам сотилган балиқларини беришади. Беш минг сўмдан тозалаб бераверамиз. Муҳими — бўш қолмасак бўлди, бизга иш бўлиб тургани яхши”, — дейди Жамшид Каримов.
Унинг айтишича, бир ишчи кунига ўртача 100-150 та балиқ тозалайди, бу кўрсаткич шанба, якшанба кунлари 200-350 тани ташкил қилади. Махсус ускуна йўқ, ҳаммаси қўлда бажарилади.
“Биз иложи борича бу ишни бир кишига топшириб қўймаймиз, чунки тозалаш осон эмас — айрим балиқларнинг тангаси қаттиқ бўлади, кўп куч талаб этади, қўллар кесилиб кетади. Лекин савдо кўпайиб кетган пайтларда тозалаш бир кишига қолиб кетади. Айниқса, кафе, ошхона эгалари бир олишда 25-30 дона маҳсулот олса, дам олишсиз уни тозалаб бергунча чарчайди одам. Харидорларни тез-тез жўнатмасак, навбат кутиб қолишади.
Ўзи одатда икки бармоқ кенглигида кесиб берамиз, лекин айрим харидорлар ўзлари қандай пиширишига қараб ўлчамини айтишади. Бир ярим килограммлик балиқлар 2-3 минг сўмдан, ундан катталари 4-5 минг сўмдан тозаланади. Чунки йирик балиқларнинг тангачалари кўчиши қийин. Балиқнинг тепа қисмидаги қанотлари қаттиқ тишли бўлади. Тирик балиқ эмасми, типирчилайди, эҳтиётсизлик қилсак, бармоқларимиз тилиниб, кесилиб қолади”, — дейди у ишининг машаққатларига тўхталар экан.
Ёз охирида бошланган балиқ савдоси кейинги йил баҳорнинг апрель ойигача давом этади. Балиқ тозаловчилар саккиз ойлик мавсумда дам олишсиз ишлайди.
“Орада жуда муҳим ишларимиз чиқиб қолмаса, ҳар куни бозордамиз. Кейин 4-5 ой дам оламиз, чунки апрелдан августгача балиқларнинг кўпайиш даврига тўғри келади, сотмаймиз. Балиқнинг нархи кескин ошиб кетади, кунлар ҳам исигач, одамлар балиқ олмай қўяди. Бошқа иш қилмайман, уйда мол боқаман, ёзда уларга қарайман. Кейин яна балиқ мавсумини бошлаймиз”, — дейди Жамшид Каримов.
Қаҳрамонимиз ишининг ёқмайдиган томонлари ҳақида гапиришни истамади. У учун ҳатто балиқ ҳиди ҳам ноқулайлик туғдирмайди.
“Ёқса-ёқмаса — ишимиз шу, бошқа иш қилолмайман. Шунча йилдан бери балиқ тозалайвериб, ҳиди ҳам билинмай кетган, ўрганиб қолганмиз. Ишимизни тугатгач бир қўл-юзимни ювиб, кўчага чиқаман, дўстларим билан кўришаман. Бирортаси устингдан балиқ ҳиди келяпти, демаган шу пайтгача. Чунки биз тирик балиқ сотамиз, ҳид ўлган балиқдан кўпроқ келади. Харидорлар бир қарашда сифатли маҳсулот олишаётганига амин бўлишлари учун балиқ солинган идишларга кислород ҳам улаб қўйганмиз”, — дейди балиқ тозаловчи.
Жамшид Каримов икки қизнинг отаси. У фарзандларини олий таълим муассасаларида ўқитишни ният қилади. Ҳаётидан нолимаса-да, фарзандларини ўзидай бозорда ишлашини истамайди.
“Ўзим 9-синфгача ўқиганман. Ўртаҳол оиладанмиз, катта фарзандман. Рўзғорга ёрдам беришим керак эди. Ёшлигимда қассобчилик қилардим. Бир кун тоғам балиққа қарашиб тур, деб ёнига чақирган. Шу-шу балиқ савдосидаман. Нолимайман, уйимиз бор, машинамиз бор. Ёмон яшамаймиз. Лекин қизларимни катта бўлса институтларда ўқитмоқчиман. Менга ўхшаб бозорда юрмасдан, ўқиса, яхши-да барибир. Улар олий таълим олиши учун қўлимдан келганча ҳаракат қиламан”, — дейди Жамшид Каримов.
Жамшид Каримов бу йилги даромадидан ота-онасини умра сафарига юборишни ният қилган.
Мақсуда Абдуқаюмова суҳбатлашди
Изоҳ (0)