Жорий йилнинг 27 ноябрь куни Сирдаё вилоятининг Ширин шаҳри ва Боёвут тумани ҳудудида Саудия Арабистонининг “АCWА Power” компанияси томонидан қурилаётган замонавий иссиқлик электр станцияси ишга тушди. Қиймати 1,1 миллиард доллар бўлган ва қуввати 1,5 гигаваттли ушбу станция 3 миллион хонадонни ва юзлаб саноат корхоналарининг электр энергиясига бўлган эҳтиёжини кафолатли таъминлайди.
Энергетика вазирлиги бош мутахассиси Саидатҳам Анваров “Дарё.уз” журналисти билан бўлган суҳбатда, Сирдарё вилоятининг Боёвут туманида янги ишга туширилган иссиқлик электр станциясининг бошқа станциялардан афзал жиҳатларини гапириб берди.
“Ушбу станцияни қуриш жараёни 2020 йилда бошланган эди. Лойиҳа Саудия Арабистонининг АCWА Power компанияси томонидан 1,1 млрд доллар миқдорида тўғридан-тўғри инвестиция киритиши орқали 34 ойда қуриб, ишга туширилди. 2020 йилда юз берган пандемия, дунёда юз берган геосиёсий вазият ва логистик муаммоларга қармай ушбу лойиҳа муддатидан аввал фойдаланишга топширилди.
2022 йилда давлат хусусий шерикчилиги асосида 6 та электр станция ишга туширилган бўлса, уларнинг жами қуввати 1374 МВт ташкил қилган. Сирдарёда қурилган иссиқлик электр станциясининг қуввати эса 1500 МВтга тенг бўлиб, бу станция Ўзбекистондаги биринчи замонавий иссиқлик электр станцияси ҳисобланади. Ушбу станцияда Япониянинг “Mitsubishi” компаниясининг энг замонавий, фойдали иш коэффициенти 60 фоиздан юқори бўлган газ турбиналари ўрнатилган. Ҳозир биздаги эски иссиқлик электр станцияларидаги газ турбиналарининг фойдали иш коэффициенти 30-50 фоиз. Янги станция эски иссиқлик электр станцияларига қараганда 1,5–2 баравар кам ёқилғи сарфлайди. Яъни ёқилғини кам сарфлаб, кўпроқ электр энергия ишлаб чиқаради. Ушбу электр станция орқали биз йилига 1 миллиард куб метр табиий газни тежаймиз. Тежалган газни эса қўшимча ёқилғи сифатида ёки 450 мингдан ортиқ истеъмолчига етказиб беришимиз мумкин бўлади.
Ҳозир станциянинг биринчи 500 МВт турбиналари ишга туширилди. Жорий йилнинг декабрь ойида эса яна битта газ турбинаси ишга туширилиб, станциянинг умумий қуввати 1000 МВтга етказилади. 2024 йилнинг биринчи чорагида станция тўлиқ ишга туширилиб, унинг қуввати 1 500 МВтга чиқарилади. Станция тўлиқ ишга туширилгач, йилига 12 млрд кВт/соат электр энергияси ишлаб чиқаради. Бу ҳажмдаги электр энергия юртимиздаги 3 миллиондан зиёд хонадоннинг бир йиллик ёки барча аҳоли истеъмолчиларининг қарийб 8 ойлик истеъмолини қоплаш имконини беради”, – дея таъкидлади Саидатҳам Анваров.
Энергетика вазирлиги бош мутахассисининг қўшимча қилишича, 2023 йилда Ўзбекистоннинг бир қатор ҳудудларида хориж компаниялари иштирокида 3 та янги иссиқлик электр станциясининг қурилиш жараёнларига старт берилган.
“2022 йилда давлат хусусий шерикчилик асосида 6 та электр станция ишга туширилган бўлса, бу йил эса Сирдарёдаги иссиқлик электр станцияси фойдаланишга топширилди. Худди шу Сирдарё вилоятининг Боёвут туманида Франция, Германия, Қатар ва Япониянинг бир қатор компаниялари томонидан қуввати 1574 МВтга тенг бўлган янги иссиқлик электр станцияси қурилмоқда. Ушбу станциянинг қурилиш жараёни жорий йилда бошланган ва 2026 йилда фойдаланишга топшириш режа қилинган.
Бундан ташқари, 2023 йилда Сурхондарё вилоятининг Ангор туманида қуввати 1560 МВтга тенг бўлган иссиқлик электр станциясини қуриш ишларини бошлаш режа қилинган. Шунингдек, 2023 йилнинг август ойида Жиззах вилоятида қуввати 550 МВтга тенг бўлган иссиқлик электр станциясини қуриш жараёнлари бошланди. Бу станция 27 ой ичида, 2025 йилга қадар ишга туширилиши кўзда тутилган”, – дея таъкидлади вазирлик мутахассиси.
Изоҳ (0)