Венгрия бош вазири Виктор Орбан мигрантларни қабул қилишга кескин қарши чиқди.
"Венгрия ҳеч қандай ҳолатда ҳам мигрантларни ўз ҳудудига киришига рухсат бермайди", - дея унинг сўзларидан иқтибос келтиради Сербиянинг Политика газетаси.
Орбаннинг қайд этишича, Венгрия Европа Иттифоқининг бошқа қатор мамлакатларида содир бўлган воқеаларнинг бундай ривожланишига йўл қўймайди. Шу билан бирга, у миграция террор таҳдидлари, жиноятчилик ва параллел жамиятлар пайдо бўлиши билан боғлиқлигини таъкидлади.
Унинг сўзларига кўра, ЕИ Венгрияни миграция масаласида "шантаж" қила олмайди, чунки бу масала пулдан муҳимроқ.
Декабрь ойи охирида Будапешт Европа Иттифоқининг миграция ва бошпана тизимини ислоҳ қилиш ҳақидаги келишувига кескин қарши чиққанди.
"Биз бу миграция пактини қатъий рад этамиз. Ўз иродамизга қарши ҳеч кимни мамлакатимизга киритмаймиз. Брюсселдан ёки бошқа жойдан туриб ҳеч ким бизга кимни киритишимиз мумкинлигини айтиб ақл ўргата олмайди", — деганди ўша пайтда Венгрия ташқи ишлар вазири бўлган Петер Сиярто.
Изоҳ (0)