Венгрия бош вазири Виктор Орбан нега аъзо давлатларга Украинани Европа Иттифоқига қабул қилиш бўйича музокараларни бошлашга қарор қилишига тўсқинлик қилмаганини тушунтирди. Унга кўра, Венгрия бу жараённи яна 75 марта тўхтатиш имкониятига эга.
“Ҳал қилувчи далил шундан иборат эдики, Украинанинг аъзолиги бўйича якуний сўзни 27 та парламент, шу жумладан, Венгрия парламенти айтиши кераклигини ҳисобга олсак, Венгрия ҳеч нарсани йўқотмайди. Шундай экан, агар биз Украинанинг Европа Иттифоқига аъзо бўлишини истамасак, Венгрия парламенти унга қарши овоз беради”, — деди Орбан Коссутҳ радиоси орқали.
Бош вазир, шунингдек, бу масала жуда узоқ давом этишини таъкидлади, чунки у аввало аъзо мамлакатлар парламентларига етиб бориши керак. “Венгрия ҳукуматида бу жараённи тўхтата оладиган тахминан 75 та ҳолат бўлади”, — дея қўшимча қилди у.
Politico манбаларига кўра, Украинанинг Европа Иттифоқига қўшилиши бўйича музокаралар бошланишини муҳокама қилиш чоғида Германия канцлери Олаф Шольц Виктор Орбанга “ташқарига чиқиб, қаҳва ичиб келиш”ни таклиф қилган.
Нашр таъкидлаганидек, Олаф Шольцнинг бу ғояси Европа Иттифоқи ва Украина ўртасида музокараларни бошлаш бўйича бир овоздан қарор қабул қилишга имкон берди. Бу қоида Европа Иттифоқи давлатларидан бири вакили бўлмаган тақдирда ҳам, амал қилади.
Изоҳ (0)