“Вагнер”га янги раҳбар тайинланди. Гуруҳ ёлланма жангчиларни қайта йиғмоқда

“Вагнер” гуруҳи Перм ва Новосибирскда жангчиларни ёллашни қайта бошлади, деб хабар бермоқда Россиянинг “59.ру” ва “Нгс.ру” нашрлари.

Пермдаги “Вагнер” вакилининг айтишича, гуруҳ Россия миллий гвардиясининг бўлинмасига айланган. Бўлинмага “Вагнер” асосчиси Евгений Пригожиннинг ўғли ва ягона меросхўри Павел Пригожин бошчилик қилади.

“Биз жанговар тажрибага эга одамларни, шу жумладан хусусий ҳарбий компаниянинг бир қисми бўлганларни ишга оламиз”, — деди “59.ру” манбаси.

Унга кўра, тўлов ёлланма аскарларнинг хизмат қиладиган жойига қараб 80 мингдан 240 минг рублгача бўлади. Шартнома муддати олти ойдан бошланади.

1 ноябрь куни “Вагнер” гуруҳининг Новосибирскдаги офиси вакили “Нгс.ру”га ишга қабул қилиш “икки-уч кундан бери” давом этаётгани ҳақида хабар берди. Унинг сўзларига кўра, ҳозирча “судланганлар, касаллар қабул қилинмайди”.

“Вагнер” ишга қабул қилишни қайта бошлагани ҳақидаги биринчи хабарлар 27—28 октябрь кунлари гуруҳга алоқадор Telegram каналларда, шунингдек, “вагнерчи”ларнинг қариндошлари чатларида пайдо бўлди.

“Важние истории” ёзишича, рўйхатга олиш Украинадаги урушда илгари қатнашмаганлар, шунингдек, армияда хизмат қилмаганлар, ОИВ ва гепатит билан касалланганлар учун очилган. “Вагнер”га алоқадор Telegram каналлар гуруҳ Пригожин исёнидан кейин Россия Мудофаа вазирлигига ўтган собиқ ёлланма аскарларни қабул қилмаслигини таъкидлади.

“Вагнер” вакили нашрга гуруҳ “Россия гвардияси билан расмий келишувга эга бўлган ягона отряд” эканлигини айтди. Нашрнинг ёзишича, ёлланма аскарларни Россия гвардиясига ўтказиш бўйича музокараларни Павел Пригожин ва “Вагнер” қўмондони Антон (Lotus) Элизаров олиб борган.

17 октябрь куни Давлат Думаси Россия гвардиясига “ихтиёрий тузилмалар” яратишга рухсат берувчи қонун лойиҳасини биринчи ўқишда қабул қилди. Оммавий ахборот воситалари “Вагнер” ёлланма аскарлари Россия гвардиясининг “кўнгилли тузилмалари”га қўшилишини тахмин қилишди. Қонун лойиҳаси муаллифларидан бири, депутат Александр Хинштейннинг таъкидлашича, ҳужжат “Вагнер” собиқ бўлинмаларининг Россия гвардиясига ўтказилиши ҳақидаги маълумотларга “ҳеч қандай тарзда алоқадор эмас”.