Ҳиндистон ва Франция биргаликда ҳарбий техника ишлаб чиқаришга келишиб олди

Ҳиндистон ва Франция Ҳиндистон Қуролли кучлари ва дўст давлатлар учун ҳарбий техника, жумладан, вертолёт ва сувости кемаларини биргаликда ишлаб чиқариш бўйича келишувга эришди, деб хабар бермоқда Ғарб матбуоти Ҳиндистон ҳукумати баёнотига таяниб.

Мазкур келишувга Франция президенти Эммануэл Макроннинг Ҳиндистонга ташрифи чоғида эришилган: 26 январь куни у Ҳиндистон Республика куни шарафига ўтказилган ҳарбий параднинг бош меҳмони бўлди, бош вазир Нарендра Моди билан учрашди ва Ҳиндистон президенти Драупади Мурму томонидан берилган давлат зиёфатида қатнашди.

Баёнотга кўра, Макрон ва Моди ҳарбий ишлаб чиқариш, атом энергетикаси, космик тадқиқотлар, соғлиқни сақлаш, қишлоқ хўжалиги ва иқлим ўзгаришида сунъий интеллектдан фойдаланиш соҳасидаги алоқаларни кенгайтиришга келишиб олган.

Хусусан, Ҳиндистонда Франциянинг Safran SA компаниясининг энг замонавий двигателлари ҳамда Францияда ишлаб чиқарилган Dassault Rafale қирувчи самолётларининг двигателларини таъмирлаш ва техник хизмат кўрсатиш маркази очилади.

Бироқ баёнотда транзакциялар қиймати кўрсатилмаган.

Ҳиндистоннинг Tata Group конгломерати ва Airbus ҳам фуқаролик вертолётларини ишлаб чиқариш бўйича шартнома имзолади.

Бундан ташқари, мамлакатлар 2020 ва 2022 йилларда Франциянинг Реюнён оролининг хориждаги департаментидан ўтказилган қўшма разведка миссиялари тажрибасига асосланиб, Ҳиндистон океанининг жануби-шарқий қисмида ҳамкорликни мустаҳкамлашга қарор қилди.

ОАВ Россиядан кейин Ҳиндистоннинг энг йирик қурол етказиб берувчиси Франция эканини эслатиб ўтди.