Хитой раҳбарияти Эрон ҳукуматидан Ямандаги ҳусийларни савдо кемаларига ҳужум қилишидан қайтаришни сўраган, чунки бу икки томонлама савдога хавф туғдиради. Бу ҳақда тўрт эронлик манба ва дипломатга таяниб, Reuters хабар берди.
Пекин ва Теҳрон делегациялари ушбу масала бўйича бир неча учрашувлар ўтказган. Хитой томони савдога мумкин бўлган зарар ҳақида ҳеч қандай аниқ изоҳ ёки таҳдидлар билдирмаган. Манбаларга кўра, Хитой расмийлари, агар Хитой кемаларига зарар етказилса ёки Хитой манфаатларига таъсир қилса, Эрондан жуда ҳафсаласи пир бўлишини очиқ айтган.
“Хитой моҳиятан шундай демоқда: Агар бизнинг манфаатларимизга бирон-бир тарзда зарар етказилса, Теҳрон билан бизнесимизга таъсир қилади. Шундай экан, ҳусийларга ўзини тутишларини айтинг”, — дейди агентлик суҳбатдошларидан бири.
АҚШ томони Хитойдан ҳусийларни тийиш учун Эрон устидан ўз таъсиридан фойдаланишни сўраган, дейди Reuters агентлигига АҚШнинг юқори мартабали расмийлари манбаси.
Тегишли хабарга изоҳ бериш сўралганда, Хитой Ташқи ишлар вазирлиги қуйидагича жавоб берди:
“Пекин Яқин Шарқнинг самимий дўсти ва минтақавий хавфсизлик ва барқарорликни қўллаб-қувватлаш, шунингдек, умумий ривожланиш ва фаровонликка интилиш тарафдори”, — дейилади муносабатда.
Пекин январь ойида Қизил денгиздаги тижорат кемаларига ҳужумларни тўхтатишга чақирган, бироқ ўз баёнотида Эрон ёки ҳусийлар ҳақида гапирмаган.
- Хитой нефтни қайта ишлаш заводлари 2023 йилда Эрон хом нефтининг 90 фоиздан ортиғини сотиб олди. Бошқа потенциал харидорларга АҚШ санкциялари тўсқинлик қилади, натижада Хитой нефтни сезиларли чегирмада олади. Хитой санкцияга учраган Эрон, Венесуэла ва Россиядан нефть сотиб олиб, миллиардлаб долларни тежади, бу давлатлар Пекинга хом нефть импортининг деярли 30 фоизини таъминлайди.
Изоҳ (0)