АҚШда ўлимга ҳукм қилинган маҳбус биринчи марта азот гази билан қатл қилинди. Бундай ўлим жазоси Алабама штатида 1988 йилда Элизабет Сеннетни ўлдиришда айбланган Кеннет Южин Смитга нисбатан қўлланди.
Элизабет Сеннет 1988 йил 18 март куни ўлик ҳолда топилган. Жабрланувчининг эри Чарльз Сеннет полицияга мурожаат қилган. Аёл ўлгунича калтакланган, уйдаги қимматбаҳо буюмлар йўқолган, бу ўғирлик пайтидаги қотилликка ўхшарди. Тергов жараёнида Элизабет Сеннетнинг қотиллигига унинг эри буюртма бергани маълум бўлди. Чарльз Сеннетнинг катта қарзи бўлган, у буни хотинининг суғуртасидан тўлов олиш орқали ҳал қилишга умид қилган. Қотилликнинг бевосита айбдорлари Кеннет Смит ва Жон Паркер бўлиб, ҳар бирига 1000 доллардан тўланган. Чарльз Сеннет қотилликдан бир ҳафта ўтиб, асосий гумондор экани аён бўлгач, ўз жонига қасд қилди. Жон Паркер 2010 йилда қатл этилди.
Қатл давомида Смитга махсус ниқоб кийдирилди, унга 15 дақиқа давомида азот берилди. Гувоҳларга кўра, дастлабки икки дақиқада Смит ҳушида бўлган.
Ҳукм ижро этилишидан олдин, Смит қатлни кузатаётганларга мурожаат қилиб, шундай деган:
“Бугун Алабама инсониятни ортга қадам ташлашга мажбурлади... Мен севги, тинчлик ва ёруғликка кетяпман”.
Қотиллик қурбони бўлган аёлнинг ўғилларидан бири ҳукмнинг ижросини шарҳлар экан “Кеннет Смит 35 йил олдин нотўғри қарор қабул қилгани, бугун унинг бадалини тўлаганини” айтди.
Смитни ўлдириш ҳукми иккинчи уринишда амалга оширилди. 2022 йилда уни ўлимга олиб келадиган инексия йўли билан қатл қилишмоқчи бўлган, аммо жаллодлар шприц игнасини томирга кирита олишмаган. Смитнинг адвокати уни яна қатл қилишга уриниш асоссиз шафқатсизлик бўлишини таъкидлашга уринган. Суд ижрони бекор қилишдан бош тортган.
Алабамада қўлланган янги қатл усули аввалроқ ҳуқуқ ҳимоячилари ва шифокорлар томонидан оммавий равишда қораланган эди. Хусусан, БМТнинг Инсон ҳуқуқлари бўйича Олий комиссари азот гази билан қатл қилиш халқаро ҳуқуққа мувофиқ қийноқ ва шафқатсиз муомалага тенглаштирилиши мумкинлигини айтган, деб ёзади BBC рус хизмати. Шу билан бирга, Алабама штати расмийлари азот газини “энг инсонпарварча қатл усули” деб атаган.
Изоҳ (0)