Россия санкциялар оқибатида олтинни умуман бошқа давлатларга сота бошлади

Россия Европа Иттифоқи ва G7 давлатлари томонидан санкциялар жорий қилинганидан кейин Бирлашган Араб Амирликлари (БАА), Гонконг ва Туркияга олтин етказиб беришни қайта йўналтирди. Унчалик таниқли бўлмаган компаниялар рус олтинларини сотишни бошлади. Бу ҳақда Import Genius’га таяниб Bloomberg хабар берди.

БАА Россия олтинини сотишнинг асосий йўналишига айланди. 2022 йилнинг мартидан августигача ушбу металл экспорти ҳажми 500 млн долларга етди. Бу даврда Paloma Presious ва Al Bahrain Jewelers етказиб бериш билан шуғулланган — улар 109 миллион ва 50 миллион доллар миқдорида олтин импорт қилган.  

Бундан ташқари, мартдан августгача Истанбул портидан тахминан 305 миллион долларлик олтин ўтган.

Гонконгда рус олтинини BPower Financе Security компанияси томонидан ҳам импорт қилинади, у 300 миллион доллар миқдоридаги қимматбаҳо металлни Россиядан олиб чиқиб кетган. 

ImportGenius таъкидлашича, кўплаб янги трейдерлар учун олтин сотиш уларнинг асосий фаолиятига кирмайди. Масалан Аcтаva Trading DMSS — дон ва мойли ўсимликлар бозорларига ихтисослашган брокерлик фирмаси ҳисобланади. 

Шунингдек, Россияда олтин импорти билан боғлиқ операциялар кичикроқ банклар томонидан йўлган қўйила бошлади. Санкциялар қўлланилишидан олдин бу одатда “Cбербанк” ва ВТБ томонидан амалга оширилган.

Россия ва Украина ўртасида уруш бошлангандан сўнг, санскиялар оқибатида Россия компаниялари йирик банклар, жумладан JPMMorgan Chase ва HSBC Exit билан ҳамкорлик қилиш имкониятини йўқотди.

Шунингдек, қимматбаҳо металларни ташиш бозорида ҳукмронлик қилувчи Brink’s ва Loomis компаниялари ҳам Россия билан ҳамкорликни тўхтатди.

Уруш бошлангунга қадар Россия олтинлари асосан Буюк Британияга йўналтирилар ва шу мамлакатдаги компаниялар рус олтинини кўпроқ сотиб олар эди. 

Ҳозирда G7 ва Европа Иттифоқининг санкциялари Россия олтинини ўз бозорларига олиб киришни ва уларда жойлашган компанияларга уни бошқа жойларда сотишни тақиқлайди.

Аммо бошқа мамлакатлардаги фирмаларга иккиламчи санкциялар йўқлиги сабабли ҳали ҳам Россия олтини билан шуғулланиш ҳеч қандай қоидабузарликка сабаб бўлмайди. 

Маълумот учун, Россия дунёда Хитойдан кейин иккинчи энг йирик олтин қазиб олувчи давлат ҳисобланади.