Қашқадарё вилоятининг Косон туманида раҳбарлик қилаётган Асрол Бойқараев ўзи ҳақида тарқалган хабарга изоҳ бериб, рўзадорларга мажбуран сув ичириб, оғзини очирганини рад этди. Бу ҳақда қашқадарёлик блогер Азизбек Яздурдиев хабар тарқатди.
Таъкидланишича, туман ҳокими бу ҳақида бугун, журналист ва блогерлар билан бўлган навбатдаги мулоқотида гапириб берган.
Матбуот анжуманида сўз олган блогер Азизбек Яздурдиев Косон ҳокими Асрол Бойқараевга юзланиб, тармоқларда тарқалган хабар — ҳокимнинг рўзадорларга мажбуран сув ичириб, рўзасини очиргани ҳақидаги маълумотга изоҳ сўраган.
Прокуратурадагилар 110 кишидан ортиқ одамни сўроқ қилишди. Ҳаммаси “ҳоким менинг оғзимни очиртирмади”, деган. Улар ўйлашдики, ҳоким буларга гап ўргатиб қўяди деб, “мелиса” билан битта-битта олиб келиб, сўроқ қилди. 110 кишига 20 минут ичида мен қандай ўргатаман, шундай деб айтинглар деб. Айтолмайман-ку. Ҳаттоки Қуръонга қўлини қўйдириб, ҳоким шу ишни қилдими ёки қилмадими деб сўрашди. Қилмади, дейишди, — дейди Асрол Бойқараев саволга жавоб берар экан.
Бунга қадар ҳам ижтимоий тармоқларда Асрол Бойқараев билан боғлиқ кўплаб маълумотлар тарқалганди.
2021 йилда унинг хизмат автомобили туман марказида бир фуқарони уриб юборгани, оқибатда фуқаро вафот этгани хабар берилди. Сўнгра мазкур ЙТҲга ҳокимнинг биринчи ўринбосарини олиб юрувчи ҳайдовчи айбдор экани, ЙТҲ содир бўлган пайтда автомобилда ҳоким бўлмагани маълум қилинди. Аввалроқ эса Асрол Бойқараевнинг қамоққа олингани ёзиб чиқилди.
Бунга муносабат билдирган ҳокимлик ахборот хизмати “тасдиқланмаган, ваҳима ва шов-шув учун тарқатилаётган ёлғон хабарларга ишонманг”, деди. Бир оздан сўнг Telegram’даги каналларнинг бирида Косон тумани ҳокими Асрол Бойқараевнинг матбуот котибига ўзини тез-тез ёритиб туришини сўрагани, охирги маротаба уни матбуот котиби қутқариб қолгани айтилган хабар тарқалди. Косон ҳокими матбуот котиби Дилшод Набиев эса мазкур хабарни ҳам рад этди.
Изоҳ (0)