Аввалига қамалгани, кейинчалик матбуот котибидан нажот сўрагани айтилиб, рад этилган Косон тумани ҳокими Асрол Бойқараев соғлиғини тиклаб, даволаниш таътилидан ишига қайтди. Бу ҳақда ҳокимлик ахборот хизмати хабар берди.
«Туман ҳокими Асрол Бойқараев соғлигида муаммо бўлгани учун июль ойида ҳам даволаниш таътилига чиққанди. Куни кеча ҳоким соғлигини тиклаб, яна ўз вазифасини бажаришга киришди», — дейилади ҳокимлик ахборотида.
Ижтимоий тармоқларда Асрол Бойқараев билан боғлиқ кўплаб маълумотлар тарқалганди.
2021 йилда унинг хизмат автомобили туман марказида бир фуқарони уриб юборгани, оқибатда фуқаро вафот этгани хабар берилди. Сўнгра мазкур ЙТҲга ҳокимнинг биринчи ўринбосарини олиб юрувчи ҳайдовчи айбдор экани, ЙТҲ содир бўлган пайтда автомобилда ҳоким бўлмагани маълум қилинди. Аввалроқ эса Асрол Бойқараевнинг қамоққа олингани ёзиб чиқилди. Бунга муносабат билдирган ҳокимлик ахборот хизмати «тасдиқланмаган, ваҳима ва шов-шув учун тарқатилаётган ёлғон хабарларга ишонманг», деди. Бироздан сўнг Telegram’даги каналларнинг бирида Косон тумани ҳокими Асрол Бойқараевнинг матбуот котибига ўзини тез-тез ёритиб туришини сўрагани, охирги маротаба уни матбуот котиби қутқариб қолгани айтилган хабар тарқалди. Косон ҳокими матбуот котиби Дилшод Набиев эса мазкур хабарни ҳам рад этди.
Изоҳ (0)