Фаластиннинг ҲАМАС ҳаракати Ғазо секторида вақтинчалик ўт очишни тўхтатишга рози бўлмайди, Исроил эса ўзаро келишувга эришишга “ҳали тайёр эмас”, деди ҳаракатнинг сиёсий бюроси аъзоси Усама Ҳамдан Sky News Arabia телеканалига берган интервьюсида.
“Биз вақтинчалик ўт очишни тўхтатиш бўйича музокараларга рози бўлмаймиз. Исроил томони ҳамон бизнинг талабларимизни четлаб ўтмоқда ва ўзаро тушунишга эришмоқчи эмас”, — дея Ҳамданнинг сўзларини келтиради телеканал.
Ҳаракат сиёсий бюроси аъзосининг қўшимча қилишича, Исроил билан ҳар қандай келишув халқаро ва минтақавий кафолатларга эга бўлиши керак.
Аввалроқ Исроил ҲАМАСга Ғазо секторида гаровга олинган барча одамларни озод қилиш эвазига икки ойлик ўт очишни тўхтатиш бўйича сулҳ таклиф этгани хабар қилинганди.
Келишув барча тирик қолган асирларни озод қилишни, ўлганларнинг жасадларини бир неча босқичда қайтаришни ўз ичига олади, дейилганди Axios сайтида эълон қилинган материалда.
Изоҳ (0)