Украина ташқи ишлар вазири Дмитрий Кулеба мамлакатнинг 2024 йилга мўлжалланган устувор йўналиши Россия устидан осмонда устунликка эришиш эканини айтди. Бу ҳақда BBC хабар берди.
Давосдаги Жаҳон иқтисодий форумида сўзга чиққан Дмитрий Кулеба ўз ҳаво ҳудуди устидан тўлиқ назоратни қўлга киритиш Украинанинг Россия босқинини қайтаришдаги муваффақияти учун муҳим эканини айтди.
“2024 йилда, албатта, Россияни осмондан улоқтириш устувор вазифадир, чунки осмонни ким бошқарса, уруш қачон ва қандай тугашини белгилайди”, — деди Кулеба.
Унинг сўзларига кўра, бунинг учун Украинага бошқа нарсалар қаторида F-16 самолётлари, узоқ масофали ракеталар ва радиоэлектрон уруш ускуналари керак.
“Агар буларнинг барчасига эга бўлсак, биз ғалаба қозонишда ва озод бўлишда давом этамиз”, — деди Украина ТИВ раҳбари.
Январь ойи бошида Даниядан Украинага F-16 қирувчи самолётларини етказиб бериш бир неча ойга қолдирилгани маълум бўлди. Копенгаген 2024 йил бошига қадар дастлабки олтита авиатехникани Киевга топширишни режалаштирган, бироқ бу муддатлар ўзгарган. Етказиб бериш энди иккинчи чоракда кутилмоқда, деб хабар берди Berlingske нашри қироллик Мудофаа вазирлигига таяниб.
Изоҳ (0)