Ўзбекистонда бир кунда 94 та истеъмолчи томонидан электр энергияси ва табиий газдан ноқонуний фойдаланиш ҳолатлари аниқланди, деб хабар беради Энергетика вазирлиги матбуот хизмати.
Маълум қилинишича, 22 январь куни “Ўзэнергоинспекция” ишчи гуруҳлари томонидан ўтказилган назорат тадбирларида электр энергияси ва табиий газдан фойдаланиш бўйича 94 та истеъмолчи томонидан қоидабузарликка йўл қўйилгани аниқланган. Шунингдек, энергия ресурсларидан фойдаланиш қоидаларини бузиш билан боғлиқ ҳуқуқбузарлик бўйича 33 та маъмурий иш расмийлаштирилган.
Ишчи гуруҳ томонидан ҳудудларда 961 та профилактик тадбир ўтказилган ҳамда таъминотчи корхоналар томонидан амалга оширилган ишлар юзасидан 202 та объект ўрганилган.
Реактив қувватни компенсация қилувчи қурилмалар ўрнатиш юзасидан тадбиркорлик субъектларида тушунтириш ишлари олиб борилиб, 349 та истеъмолчига нисбатан тегишли кўрсатмалар берилган.
Аввалроқ Ўзбекистонда декабрь ойининг 15 кунида айрим истеъмолчиларнинг электр энергияси ва табиий газдан ноқонуний фойдаланиши натижасида давлат манфаатларига 73 миллиард 274 миллион сўмлик зарар етказилгани тўғрисида хабар берилганди. Шунингдек, Бухоро, Самарқанд ва Навоийда салкам 1 миллиард сўмлик газдан ноқонуний фойдаланиш ҳолатлари фош этилган эди.
Изоҳ (0)