Бугун, 23 январь куни Литва Давлат мудофаа кенгаши Германиянинг Leopard 2 танкларини сотиб олишни маъқуллади, деди Литва президентининг маслаҳатчиси Кестутис Будрис кенгаш йиғилишидан сўнг журналистларга берган интервьюсида.
Шартноманинг нархи, шунингдек, қанча танк харид қилиниши ҳақида аниқ маълумот берилмаган.
“Литва томонидан ўрнатилган барча мезонларга жавоб берадиган энг самарали танк бу Германиянинг Leopard 2 танкидир”, — деди Кестутис Будрис.
Унга кўра, Германия билан ҳарбий техника сотиб олиш бўйича батафсил музокараларни бошлаш тўғрисида қарор қабул қилинган. Нашр маълумотларига кўра, Литванинг танкларни сотиб олиш нияти 2023 йилнинг ёзида маълум бўлган, бироқ кейинчалик сотиб олиш бўйича якуний қарор қабул қилинмаган.
2023 йил июль ойида Германия мудофаа вазири Борис Писториус Литвада немис ҳарбий бригадаси жойлаштирилишини эълон қилди. Бригада 4 минг кишидан иборат бўлиши кўрсатилган. Бригаданинг муваққат қўмондонлиги 2024 йилнинг иккинчи чорагида, тўлиқ қўмондонлиги эса 2025 йилда жорий этилиши режалаштирилган.
Писториуснинг таъкидлашича, немис ҳарбийлари Россия ҳужуми содир бўлиши хавфи туфайли Литвага жойлаштирилган.
2023 йил декабрь ойида Литва Сейми 2024 йилги давлат бюджетини қабул қилишда мудофаа учун рекорд миқдор ажратди. Унга кўра, ялпи ички маҳсулотнинг 2,75 фоизи Мудофаага сарфланиши кўзда тутилган. Ўтган йили Литвада ялпи ички маҳсулотнинг 2,75 фоизи мудофаага сарфланганди.
Изоҳ (0)