Axios: Исроил ҲАМАСга икки ойлик оташкесим таклиф қилди

Исроил ҲАМАСга Ғазо секторида гаровга олинган барча одамларни озод қилиш эвазига икки ойлик оташкесим таклиф қилди. Бу ҳақда 22 январь куни Axios ахборот сайти исми сир қолишни истаган икки Исроил расмийсига таяниб хабар берди. Бу таклиф Миср ва Қатардаги воситачилар орқали етказилган.

Келишув барча тирик қолган асирларни озод қилишни, ўлганларнинг жасадларини бир неча босқичда қайтаришни ўз ичига олади, деди Axios манбалари. Уларга кўра, биринчи босқич аёллар, 60 ёшдан ошган эркаклар ва оғир аҳволдаги гаровга олинганларни озод қилишдан иборат. Кейинги босқичларда аёл ҳарбийлар, 60 ёшга тўлмаган ноҳарбий эркаклар, исроиллик эркак ҳарбий хизматчилар қўйиб юборилиши ва ҳалок бўлганларнинг жасадлари қайтарилиши керак.

Ғазо секторига тинч аҳолининг қайтарилиши

Бундан ташқари, таклиф Исроил мудофаа кучларини қайта жойлаштиришни, хусусан, уларнинг бўлинмаларини Ғазо секторидаги асосий аҳоли пунктларидан олиб чиқиб кетишни ўз ичига олади. Бу фаластинлик тинч аҳолига аста-секин Ғазо шаҳри ва секторнинг шимолий қисмларига қайтиш имконини беради, деди Axios.

Исроил ва ҲАМАС вакиллари исроиллик гаровга олинганлар эвазига озод қилинадиган фаластинлик маҳбуслар сони бўйича келишиб олиши керак бўлади. Бироқ таклиф Исроил ҳарбий операцияни тўхтатишга ёки Исроил қамоқхоналаридаги 6 000 нафар фаластинлик маҳбусларнинг ҳаммасини озод қилишга рози бўлмаслигини яққол кўрсатиб турибди, деди Axios суҳбатдошлари. Исроил расмийлари ҲАМАСдан жавоб кутмоқда, бироқ улар яқин кунларда олдинга силжиш бўлиши эҳтимолига эҳтиёткорлик билан қараётганини қўшимча қилди.

Ynet нашри ҳам шунга ўхшаш маълумотларни тақдим этди: унга кўра, Исроил таклифи узоқ муддатли ўт очишни тўхтатишни ва гаровга олинганларни босқичма-босқич озод қилиш эвазига Исроил ҳарбий бўлинмаларининг Ғазо секторидаги ҳаракат йўналишларини вақтинчалик ўзгартиришни ўз ичига олади. Исроил музокараларда муайян ташаббус кўрсатгани ҳақида бош вазир Бенямин Нетаньяху 22 январь куни гаровга олинганларнинг қариндошлари билан учрашув чоғида маълум қилди, деб хабар бермоқда Исроил матбуоти.