Тошкент вилояти Янгийўл шаҳрида тўй кортежи уюштириб, қоидабузарлик содир қилган бир гуруҳ йигитлар жавобгарликка тортилди.
Ижтимоий тармоқларда тўй маросимига кетаётган ёшлар машина рулини қўйиб юбориб, бутун танасини салондан чиқариб кетаётгани акс этган видео тарқалган эди.
“Газета.уз”нинг Олий суд матбуот хизматига таяниб ёзишича, Маъмурий ишлар бўйича Янгийўл шаҳар суди тўй кортежи иштирокчиларини 10 суткага қамоққа олиш ҳақида ҳукм чиқарган.
Тошкент вилояти ИИБ ЙҲХБ томонидан аниқланишича, воқеа 1 октябр куни тахминан соат 15:00 да Самарқанд кўчасида содир бўлган. Мазкур ҳуқуқбузарликни Янгийўл туманида яшовчи 22 ёшли икки фуқаро содир этган.
Суд уларни Маъмурий жавобгарлик тўғрисидаги кодекснинг 183-моддаси (майда безорилик)да назарда тутилган ҳуқуқбузарликни содир этганликда айбдор деб топган.
Қоидабузар ҳайдовчилар
2023 йилнинг февраль бошларида Қашқадарё вилояти Қарши шаҳрида 5 февраль куни тўй кортежи йўлнинг ҳар иккала қатнов қисмини тўсиб, гуруҳ бўлиб ҳаракатлангани тўғрисида хабар берилганди. Уларга нисбатан Маъмурий жавобгарлик тўғрисидаги кодекснинг тегишли моддаларига асосан, маъмурий баённома тузилиб, автомашиналар вақтинчалик сақлаш майдончасига қўйилган.
Апрель охирларида эса Бухоро шаҳрида транспорт воситалари ҳаракатига халақит берган тўй кортежи автомобиллари вақтинчалик жарима майдонига жойлаштирилган эди. Шунингдек, 2022 йилнинг июлида Наманганда транспорт воситалари ҳаракатига халақит берган тўй кортежи автомобиллари жарима майдонига жойлаштирилган.
Изоҳ (0)