Япониянинг SLIМ (Smart Lander for Investigating Moon) модули Ой юзасига қўнди, деб хабар бермоқда Reuters. “Ой снайпери” деб номланган қурилма Ойга GMТ билан тахминан 15:20 да (Тошкент вақти билан 19 январь 20:20) қўнган.
Япония тарихда (АҚШ, СССР, Хитой ва Ҳиндистондан кейин) Ойга космик кема қўндирган бешинчи давлат бўлди.
Бироқ зонд билан дарҳол алоқа ўрнатиш имкони бўлмаган. Sky News ва BBC хабарларига кўра, Япониянинг JАХА космик агентлиги YouTube’да қўнишнинг жонли трансляциясини тўхтатиб, миссия муваффақиятини маълум вақт давомида тасдиқламаган.
Кейинроқ Коинот ва космонавтика институти бош директори Хитоши Кунинака қурилма “буйруқларни қабул қилаётганини” ва уларга “жавоб бераётганини” айтди. Бироқ, JАХА маълумотларига кўра, модулнинг қуёш батареялари “электр энергиясини ишлаб чиқармаяпти”, шунинг учун мутахассислар “Ой юзасида маълумотларни йиғишга устувор аҳамият бермоқда”.
SLIМ — бу Ой юзасига транспорт воситаларининг юқори аниқликдаги қўниш технологиясини синаб кўриш учун мўлжалланган модул. У Ер табиий йўлдошининг рельефи ва кратерларини ўрганиши керак. Модулнинг баландлиги 2,4 метр ва кенглиги 2,7 метр, оғирлиги тахминан 200 килограмм. Қурилма Ой юзасидаги жинсларда темир ва бошқа элементлар миқдорини ўлчаш имконини берувчи камера билан жиҳозланган.
SLIМ аппарати ракета-ташувчи билан Кагосима префектураси жанубидаги Танегасима космик марказидан 7 сентябрь куни маҳаллий вақт билан соат 08:42 да (Тошкент вақти билан 04:42) учирилган эди.
Изоҳ (0)