Япония аэрокосмик тадқиқотлар агентлиги (ЖАХА) томонидан ишлаб чиқилган биринчи SLИМ Ойга қўниш аппарати коинотга учирилди. Ракета-ташувчи Кагосима префектураси жанубидаги Танегасима космик марказидан 7 сентябрь куни маҳаллий вақт билан соат 08:42 да (Тошкент вақти билан 04:42) учди. Парвоз об-ҳаво шароити туфайли бир неча бор қолдирилганди.
Модулнинг Ер табиий йўлдоши юзасига қўниши учирилган пайтдан бошлаб 4-6 ой ичида амалга ошиши кутилмоқда. Миссия доирасида зонд кафт ўлчамидаги вездеход (исталган жойда юра оладиган техника) ва мултиспектрал камера ёрдамида ҳозиргача кам ўрганилган Ой мантиясининг таркибини таҳлил қилади.
Қурилмани ишлаб чиқишда қўлланадиган технологиялар маълум бир жойга 100 метрдан ортиқ бўлмаган хато билан қўниш имконини беради. AFP агентлигининг қайд этишича, Ойга аввалги қўнишларда бу кўрсаткич бир неча километрга етган. “Инсоният нафақат осон бўлган жойга, балки энди ўзи хоҳлаган жойга қўна олади”, дея таъкидлаган ЖАХА парвоздан олдин.
Ҳиндистон аппаратининг Ойга муваффақиятли қўниши
Икки ҳафта олдин Ҳиндистон космик кемаси “Чандраяан-3” миссияси доирасида Ой юзасига муваффақиятли қўнганди. Ҳиндистон Ер табиий йўлдоши юзасига космик кемани қўндирган тўртинчи давлатга айланди. Аввал Совет Иттифоқи, АҚШ ва Хитой бунга эришган. Шу билан бирга Россиянинг “Луна-25” станцияси август ойи охирида Ойга қўнмоқчи бўлган вақтда ҳалокатга учрагади.
Изоҳ (0)