Россия 50 йил деганда биринчи марта Ойга миссия юборди (фото, видео)

Россиянинг замонавий тарихидаги биринчи Ой миссияси Амур вилоятидаги Восточний космодромидан муваффақиятли учирилди.

11 август куни Москва вақти билан соат 02:10 да (Тошкент вақти билан 00:10)  “Луна-25” автоматик сайёралараро станцияси “Союз-2.1б” ракета-ташувчиси билан ва учирилди, деб хабар бермоқда “Роскосмос”.

Бир соат ўтгач, станция Ойга олиб борадиган траекторияга олиб чиқилган ва ракета ташувчидан ажралган.

“Луна-25” 16 август куни Ойнинг айлана орбитасига кириши, 21 август куни эса сунъий йўлдош юзасига юмшоқ қўниши режалаштирилган.

“Луна-25” Ой станцияси 1976 йилдан бери Россиянинг Ойга биринчи миссиясидир — ўша йили “Луна-24” совет станцияси учирилганди. Режага кўра, “Луна-25” Ойнинг жанубий қутбига қўнган тарихдаги биринчи станция бўлади. Миссиянинг асосий вазифалари юмшоқ қўниш технологияларини ишлаб чиқиш, ички тузилмани ўрганиш ва Ойдаги ресурсларни, жумладан, сув бор-йўқлигини ўрганишдан иборат.

Миссия бир йил давом этиши кутилмоқда.

Навбатдаги “Луна-26” станциясини 2027 йилда, “Луна-27” ни 2028 йилда, “Луна-28” ни эса 2030 йилдан кейин ишга тушириш режалаштирилган, деди “Роскосмос” бош директори Юрий Борисов.