Арманистон бош вазири Никол Пашинян мамлакат янги конституцияни қабул қилиши кераклигини айтди. У бу таклифни дунё ва минтақадаги ўзгаришлар билан изоҳлади. Бу ҳақда “Коммерсант” хабар берди.
“Арманистонга янги конституция керак, конституцияга тузатишлар эмас, балки янги конституция керак. Қолаверса, шуни таъкидламоқчиманки, одатда ушбу мавзу ҳақида гапирганда, биринчи навбатда, қуйидаги саволлар туғилади: биз қандай бошқарув тизимини ва ким учун ўзгартирмоқчимиз?” — деди Пашинян мамлакат Адлия вазирлиги ходимлари билан учрашувда.
Бош вазир мамлакатда бошқарув шакли —парламентар республика сақланиб қолишини қўшимча қилди. Унга кўра, бу Арманистоннинг демократик интилишларини ҳисобга олади ва энг қулайидир.
Никол Пашинян янги конституция халқ томонидан овоз бериш орқали қабул қилиниши кераклигига эътибор қаратди. Унинг матнида Арманистонни “янги геосиёсий ва минтақавий шароитларда янада рақобатбардош ва ҳаётий” қиладиган қоидалар акс этиши керак.
Сиёсатчи бу таклифига сабаб сифатида дунёдаги, жумладан, Жанубий Кавказ минтақасидаги ўзгаришларни кўрсатди.
“Эволюцияга қандай муносабатда бўлишимиздан қатъи назар, бу содир бўлади. Шунинг учун позициямиз ва ёндашувимиз бу эволюцияни тўхтатиш эмас, балки Арманистоннинг давлат манфаатларига мувофиқ бошқариш бўлиши керак”, — деди Пашинян.
Изоҳ (0)