Қозоғистон фуқаролигини олишни хоҳловчи хорижликлар ҳужжатларни топширишда янги гувоҳнома тақдим этиши керак бўлади. Бу ҳақда Tengrinews хабар берди.
Ички ишлар вазирининг “Очиқ юридик шахслар” порталида эълон қилинган Қозоғистон Республикаси фуқаролигига қабул қилиш масалалари бўйича буйруғига тегишли ўзгартиришлар киритилди.
“Қозоғистон Республикаси фуқаролигига соддалаштирилган (рўйхатга олиш) тартибда қабул қилиш”нинг 5-бобига қуйидаги мазмундаги банд қўшилди: аризага қуйидаги ҳужжатлар илова қилинади: Қозоғистон ҳукуматининг 2018 йил 31 январдаги 36-сон қарори билан тасдиқланган дактилоскопия ва геномик рўйхатга олиш қоидаларига мувофиқ чет эл фуқароси ёки фуқаролиги бўлмаган шахснинг дактилоскопиядан ўтгани тўғрисидаги гувоҳнома.
Шунингдек, чет эл фуқаросига Қозоғистон республикасида доимий яшаш учун рухсатнома беришни рад этиш учун асослар бўлса, соддалаштирилган тартибда фуқароликка қабул қилиш тўғрисидаги ариза рад этилиши мумкин. Ушбу асослар нима эканлиги ҳужжатда кўрсатилмаган. Илгари қоидаларда бундай банд бўлмаган.
Ички ишлар вазирининг буйруғи 23 январга қадар муҳокама қилинади.
Эслатиб ўтамиз, 2024 йилнинг 1 январидан бошлаб Қозоғистонда хориж фуқаролари дактилоскопиядан (бармоқ изини қайд этишдан) ўтиши шарт. Қозоғистон фуқаролари учун процедура ихтиёрийдир.
Изоҳ (0)