Ўзбекистонда камида 68 нафар боланинг ўлимига сабабчи бўлган “Док-1 Макс” сиропи бўйича бўлиб ўтаётган суднинг навбатдаги мажлисида ҳиндистонлик судланувчи, Quramax Medical МЧЖ директори С.Р.П. га нисбатан қўлланилган қамоқ эҳтиёт чорасини қамоқ билан боғлиқ бўлмаган бошқа эҳтиёт чорасига ўзгартириш сўралди. Бу ҳақда суд мажлисида иштирок этаётган “Дарё” мухбири хабар берди.
Мазкур илтимоснома судланувчининг адвокати Даврон Аҳмадов томонидан киритилган бўлиб, С.Р.П.нинг дини, вегетарианлигини инобатга олиш сўралди. Адвокатга кўра, ҳимояси остидаги судланувчи тергов ҳибсхонасидаги овқатларни истеъмол қилолмаяпти. Шу сабаб айни кунга қадар 15 кило вазн йўқотган. Соғлиғида муаммолар пайдо бўлмоқда.
Адвокатнинг қўшимча қилишича, судланувчида бронхиал астма, сурункали гастрит касалликлари мавжуд бўлиб, йиллар давомида даволаниб келган.
Суд мазкур илтимосномани яна рад этди.
Эслатиб ўтамиз, ҳиндистонлик С.Р.П.нинг адвокати Даврон Аҳмадов дастлаб 2023 йилнинг 11 август куни суд ҳайъатидан ҳимояси остидаги айбланувчининг дини, вегетарианлигини инобатга олиб, унга нисбатан қўлланилган қамоқ эҳтиёт чорасини бекор қилишни, айбланувчига қамоққа олиш билан боғлиқ бўлмаган эҳтиёт чораси қўлланилишини сўраганди. Суд бу илтимосномани рад этганди. Бу ҳақдаги иккинчи илтимоснома эса суднинг 2023 йил 4 октябрь куни давом этган мажлисида янграганди. Суд ўшанда ҳам мазкур илтимосномани барвақт киритилган илтимоснома деб баҳолаб, рад этганди.
Изоҳ (0)