Президент 18 январь куни бўлиб ўтган йиғилишда Нукус, Жиззах, Бекобод шаҳарлари, Шароф Рашидов, Деҳқонобод, Учқўрғон, Урганч туманларида саноат маҳсулотларини ишлаб чиқаришда ўсиш бўлмагани муносабати билан бош вазирга ушбу 7 та ҳудуд ҳокимларининг лавозимига лойиқлигини кўриб чиқишни топширди.
Йиғилишда ўтган йили айрим корхоналарда саноат маҳсулотларини ишлаб чиқариш ҳажми камайгани қайд этилди.
Ҳудудий саноатни ривожлантириш учун 24 та махсус иқтисодий ҳудуд ташкил қилинган. Уларга соддалашган тартибда ер ажратилади, солиқдан имтиёзлар бор. Лекин айрим ҳудуд раҳбарлари буни суистеъмол қилаётгани кўрсатиб ўтилди.
Хусусан, республика бўйича инфратузилмаси бор 800 гектар махсус иқтисодий ҳудудларнинг ери бўш бўла туриб, ҳокимлар уларнинг ҳудудини кенгайтириш бўйича мурожаат қилмоқда.
Эндиликда ҳокимлар махсус иқтисодий ҳудудлардаги барча ерларни тўлиқ ўзлаштирмай туриб, уни майдонларини кенгайтириш бўйича ташаббус билан чиқиши ман этилади.
Йиғилишда саноат зоналарини инфратузилма билан таъминлаш ҳолати ҳам таҳлил қилинди. Маълум қилинишича, 2023 йилда бунга бюджетдан ажратилган маблағнинг 30 фоиздан зиёди инфратузилмага масъул корхоналар, айниқса, ҳудудий электр тармоқлари лойиҳалар бўйича ишларни ўз вақтида амалга оширмагани ҳамда молиялаштиришдаги кечикишлар оқибатида ишлатилмай қолган.
Давлати раҳбари ҳудудлардаги шу каби камчиликларни аниқ мисоллар билан кўрсатиб, инфратузилма учун масъул мутасаддилар ва ҳокимларнинг қурилиш бўйича ўринбосарларини қаттиқ огоҳлантирди.
Умуман, саноат зоналарини ривожлантириш бўйича янги тажриба амалга оширилиши белгиланди. Хусусан, Бухоро, Навоий ва Тошкент вилоятидаги махсус саноат зоналарининг 240 гектар майдони хорижий компанияларга аутсорсинг асосида бошқарувга берилади.
2024 йилда махсус иқтисодий ҳудудларда 309 та йирик лойиҳаларни ишга тушириб, 40 мингта иш жойи яратиш, импорт ўрнини босувчи ва экспортбоп маҳсулотлар ишлаб чиқариш муҳимлиги қайд этилди.
Изоҳ (0)