Эрон билан зиддият кучайиб бораётгани сабабли Покистон армияси “ўта” кучайтирилган шай ҳолатга келтирилди, деди Reuters агентлигига юқори мартабали хавфсизлик амалдори. Унга кўра, ҳарбийлар Эрон томонининг ҳар қандай ҳаракатларига қатъий муносабат билдиради.
Маҳаллий Самаа телеканали манбаларга таяниб хабар беришича, Покистон Эрон ва мамлакат ғарбидан келаётган барча рейслар устидан назоратни кучайтирган, аммо Эрон самолётлари учун ҳаво ҳудудини ёпишга ҳали қарор қилгани йўқ.
Эрон ва Покистон 16 ва 18 январь кунлари мос равишда балуж бўлгинчи жангарилари билан боғлиқ нишонларга ракета ҳужумларини ўтказди. Балужлар учта давлатда яшайди: Покистонда — Балужистон вилоятида, Эронда — Систон ва Балужистон вилоятида ва Афғонистоннинг жануби-ғарбий қисмида. Бўлгинчилар Балужистон мустақиллигига эришмоқчи.
Эрон Покистондаги “Жайш ал-Адл” (Адолат армияси, суверен Балужистонни ҳимоя қилувчи ҳаракатлардан бири) террорчилик гуруҳи нишонларига ҳужум уюштирилгани ҳақида хабар берди. Исломобод Теҳроннинг ҳаракатларини қоралаб, зарбалар оқибатида икки бола ҳалок бўлгани, яна уч нафари яраланганини билдирди. Шунингдек, мамлакат Эрондаги элчисини чақириб олди.
Покистон Систон ва Балужистон вилоятидаги “террорчилар бошпаналари”га жавоб зарбаларини берди. Оқибатда тўққиз киши ҳалок бўлди, деб хабар берди Tasnim агентлиги вилоят губернаторининг хавфсизлик масалалари бўйича ўринбосари Алиризо Марҳаматига таяниб. Ҳужумга қарамай, Исломобод Эрон суверенитетини ҳурмат қилишини таъкидлади. Зарбадан сўнг Теҳрон қўшни давлатнинг муваққат ишлар вакилини Ташқи ишлар вазирлигига чақирди.
Изоҳ (0)